Google
1,599

Ovako je to u subotu bilo na Sučuraškin maškaran,maskenbalu…

Datum:February 11, 2018 11:55 pm
Comments
Komentiraj

E, ča sad napisat, a da ispadne pametno,a i da ne bude subjektivno,jerbo se reče da je u maškaran sve dozvoljeno i da ako ideš u niku prepirku, sa tebon ništo nije u redu,a to je niko pametan izmislija isto ka i sa političariman koji nas vodidu počevši od sela,grada,županije,države…,ka ono izabrani su od naroda i sad, ma kako se to nama parilo čudno sve te zakone ča donosidu je za naše dobro,samo mi to ne razumimo,pa bi se,ispada,eto, radi reda, samo bezveze karali,ma pustimo sad politiku na stranu,vratimo se mi na maškare,pa bi reka da to, maškare, nije neka apstrakcija,to su ljudi sa svojin imenon i prezimenon,vrlinama i manama,političkin opredjeljenjen…Ali dobro,ajmo mi na to ča je bilo ove godine u maškaran,pitadu me da ča san za onu malu sličicu meka selo sa dugon,da ča san meka,a ka da Vi niste u subotu bili u selo i vidili povorku,sve je bilo u duginin bojan,glavna tema i poruka oni iz povorke ispala je da su ona četiri slova (LGTB) kriva za sve ono ča nan u državi nevaja (ovrhe,nezaposlenost,siromaštvo,kopanje po kontejneriman,neimanje pinez za bolesnu dicu,ostajanja bez imovine pod nikiman čudniman okolnostiman,iseljavanje našega svita trbujon za kruvon…),jerboo,zbog toga se maškare i činidu,oni “mali” jemadu priliku jedan dan u godini uzvratit i poslat jasnu poruku onima “velikiman” ča mislidu o njiovomen radu.

A i postavlja se pitanje zašto je u povorku puno nji bilo obučeno,upravo u kako očedu prikazat, omražene jin dugine boje? a ima ona “jedna” ča je od odavna,da se ljudi u maškaraman obučijedu u ono ča jin je u podsvijesti,ono ča bi ustvari tili bit itd. ma pustimo mi te stare,ča su oni onda znali,nisu jemali ni radija, ni televizije,ni gugla…

I uvik rečen sebi neču za maškare ništa pisat,jerbo če bit ka ča san gori več napisa evo se kara sa maškaran kojiman je ka sve dozvoljeno,a je, sve jin je dozvoljeno ako čedu se itat istinon,ali nije dozvoljeno laganje,pa su tako za me napisali,da je lani Mašogadur uspija jerbo san se ja najidija,a zanimljivo je da baš lani nisan ništa o Mašogaduru pisa,jerbo bi se oto napisano protumačilo baš tako, ka da san se najidija,a to ča san lani reka sekretaru o maškar,Mariju i glavnomen i neodgovornomen uredniku Filku da ne moredu od laži i konstrukcij u kojiman su spomenute određene osobe napravit bazu,jerbo mi u godinu daan nisu uspili ništa nač,pa je bitno bilo ča izmislit,pa neka se oni kojega se taklo češe,a kad nas oti bude zvat onda čemo napisat kako je Mašogadur uspija, jerbo je niko zbog ote laži reagira, popularno rečeno,digla se prašina.

I kako vidin opet je pop na tapetu, u rubrici “A kad če bit po moju”.
Eto, kad več pišen oba onemu lanjskomen Mašogaduru kad ste slikali obavijest na vratiman od crikve koja je bila stavljena zbog niski tenperatur (ovde -10,zbog čega su ljudi masovno umirali)”Da do daljnjega nema krunice-vrata otvaramo 15 min.pri mise, zbog niski tenperatur,a Vi ste za učinit bazu,u Mašogadur mekli samo ovi prvi dijal,a ovi ostatak di se spominje led ste kropirali -makli ča,jerbo je tako zanimljivije??

I na kraju, objasnija bi zašto meni ka ča ste napisali, nevalja nijedan tobogan u parku,oni stari razbiveni,ni ovi novi ča se na njega sa sigurnosnon opremon triba penjat,a neče mi odgovarat sve dokle mi moja dica u parku ne budedu sigurna (mala sad jema trinajst,a mali dvadeset godin).

I još ništo na samomen kraju,nisan nigdi vidija da u Mašogaduru piše zašto u Maškaran više nima našega Šime poščera i kako su ga “počastili sa lipiman besidan”,a bomen ni o tomen kako je u maškare došla prinova,nova zastava,jerbo se je ona stara nigdi zagubila,vidi pribodačice.

Eto,nisan moga bit krači nego san.
Aj adijo.

Povorka:

Na maskenbalu:

Ispeci pa reci:

3 Comments add one

  1. mudrajko says:

    😀 pisat će dok mu dica od 13 i 20 godin ne budu sigurna dok se u parku igraju 😀
    Povorka? Bilo je par baz,a sve u svemu sridnja žalost.

  2. pcelica radilica says:

    I kada jednog dana dođemo pred zid i ne bude prolaza onda će se budale zapitati zašto.
    Je li ti ko pechina reka da imaš noge za +pet?
    Da znaš kako ti stoje gege ne bi nikad iz njih izlazija.
    Što se mene tiče kupačica sa natpisom Sokolana kupačima… je jedina jasna i glasna poruka u povorci.

  3. miritan i ja sta rec says:

    miritan i ja sta ovde rec moran se slozit sa pcelicom kako je tocka kupacica poslala jasnu poruku i zna li ko rec sta se to događa na veliko se suska da ce na sokolani pocet radovi?
    sta se tice masogadura slusa sam razna razmisljanja i vecina se slaze da tu fali pechina a maskare moraju napokon svatit da stranacko jednoumlje vodi ka propasti ustvari oni to znaju ali ocito je stranacka stega puno jaca

Komentiraj