Google
6,072

Predizborni skup liste Josipa Berketa

Datum:May 16, 2013 11:39 am
Comments
Komentiraj

Marijeta,Maritetaaaaa,ma ajde više dokle mi dođemo doli sve če poč ča,a kako čemo onda znat ko je sa kin bija i razgovara,a i spiza če se oladit. Evo me Mandina jeman još samo odispod desnoga oka kravlju crtu potegnit i odma dolazin. Enti,mene jesan luda,ma di mi je bila pamet pa san te zvala? Vako svaki put,koliko si u ovo godin mekla piture na se moga bi se prikooceanski brod opiturat. Ajde više. Ajme meni Gospe moja na koga si me namirila?Evo me Mandina, ma ča si se uskokodakala neče niko nidir uteč,znaš da oti skupovi uvik kasnidu,a i ča jemaš na njiman slušat svi isto govoridu ovi govori protiv onoga,a onda oni drugi uzvrati lopticu ovomen. Pari ka da si na tenisu,cilo vrime vamo,tamo,vamo,tamo vam… Ajde muči više di se gasiš sedi u auto i ajmo ča više,ka lako je u Staromen nač misto za parkirat.Evo na,a jesan li ti lipo rekla da čemo na vrime i taman ti Ban piva onu tvoju Tonku. Ajme e,a znaš da mi je ovo jedan od draži pivači,asti evo i Lucu piva,ajme meni lipo li je,sve pisme moje mladosti. A baš mi je drago di san došla,a je, dobro ti Mandina govoriš,samo, ma vidi ona tri namo ča su sa kacigan na glavan u trliše obučeni i još za ne falit svaki jema po limenku pive u ruci i ništo jin ka na trlišiman piše. A ča piše? A piše Ja sam Sandra Russo lista broj 11. I niki transparent držidu.A jesu ovo koji protukandidati? Očedu se počet tuč? Najboje da mi gremo ča dokle nan je na vrime,a jesi mi govorila ajmo Marijeta biče ti lipo ajmo,ajmo. Asti eno Berket gre prema njiman,ajme meni ča če sad bit? Uf dobro je eno se rukuje,pričadu i smijedu se,ajme je san se bila pripala. Ma ča se jemaš strašit,a kako je Beky moga drugačije od ovega reagirat,to je čovik od svita sa maniriman pravoga gospodina. Ajme Mandina da se sad vidiš dokle to govoriš, pari ka da češ se cila rastopit. Nego ajmo mi uzet porciju boba dokle ga još jema, mmm ča je lipo, ovo je praznik za nepce,a ča ti Marijeta neš vazest,a ja ti ne jin boba,a ča si finčukasta,a ma nisan finčukasta nego ne volin bob i gotovo,asti eno tamo se dilidu kape i majice, gren vazest.A ka da jemadu one sa tri x-a?A ča je reč Marijeta a, oli čemo se opet počet vriđat? Asti tebe Mandina mora čovik sa tebon ka sa malin diteton. Ajmeee,a šta je, eno se penjedu na pozornicu sad če bit udri po ovome i onome vako i nako. Asti, nisu se ni popeli,a več se kalajedu,a ja san mislila sad če bit uzvrat na one puste otrovne strelice ona gađenja i itanja blaton ča su protu kandidati prema Berketu sasuli,a on ništa,niti nije reka glasajte za me,nego a naravno da če svako od Vas glasat za onoga za koga smatra da če učinit posal kako triba. Niti za plakate koje mu na svakomen kantunu ruvinajedu nije uzvratija. A šta san ti ja Marijeta malo pri o tomen čoviku rekla,a ča to,oćeš mi ponovit, samo čekaj gren vazest maštijal jerbo vidin ja da češ se opet počet rastapat.


fala iskrenome na videju

Ispeci pa reci:

3 Comments add one

  1. iskreni says:

    Mogu vam kazat da nisam davno pojeo ovako dobro spremljen bob i tripice, a nadam se da će ga u subotu bit i u Kambelovcu na fešti o boba !

  2. prvi says:

    vidili smo na slici da ti je išlo u slast :)

  3. samo ja says:

    špančjera od jedni,spiza o drugi
    aj nije loše

Komentiraj