A ča moreš pametno još napisat o oniman događajiman ča se periodično ponavljadu svake godine? Ništa,pa ču ja ponovit ono ča san pri tri godine napisa:

Eto mi je pridjučera čer došla da očemo li i mi od bundeve učinit strašilo i osvitlit ga. Da očemo li,jedva čekan.A kako ti znaš za otu tikvu i šta se s njon čini. Bilo bi bolje da san muča jerbo mi je rekla da san konzerva i da oli ja ne gledan televiziju.Je nan ova zapadnjačka kultura od kraja osandeseti na ovamo prosvitljenje učinila. Ma zamisli ti blagodati,do onda smo samo sa onoliko pinez koliko smo u žepu jemali mogli raspolagat,a onda smo se najedan put priporodili i uz pomoč ono bokun plastične kartice moga si kupovat koliko si ko tija,a nisi se triba za takujin mašat i tribalo je dosta vrimena dokle su ljudi svatili da ono šta su kupili tribadu i platit,a jema ji šta i dan danas mislidu da če to koko drugi zamisto nji učinit.

Sičan se tamo 99-te godine kad san kraj kuče Inglešku travu posija pa mi je ovi jedan reka da san lud. A ča je sad? Da ča je sad? Kako se ta trava zove? Ingleška. A da jeli ja znan, pita on mene kakvo je vrime u Ingleškoj? A ča ja znan,nisan danas prognozu gleda. Odnija ti vrag prognozu,opčenito ono kakva su jin lita i to? A ja mu govorin onu njijovu ča glasi da ako ne vidiš Big Ben onda pada kiša,a ako ga slučajno vidiš onda znači da če kiša brzo počet. E i govori on meni i ti si sad posadija tu Inglešku travicu ovde u Dalmaciju di liti na zvizdanu i po pedeset stupnjev zna bit.

Ili ono sa luminacijan za vrime Božiča i Nove godine od kuč i okučnic činimo luna parkove. A kad je lipo za vidit,a je lipo je,a ko se toga sitija,a opet oni isti sa početka priče. A Valentinovo? Ma zamisli imaš jedan dan u godini za pokazat se kako nikoga voliš,a to naravno ne ide bez poklona i pustite one priče kako nije bitan kakvi je poklon več da je od srca.Koja glupa izreka, to ni u male dice više ne igra.Ima toga još,ali da sad ne nabrajan vratija bi se nazad na priču o tikvurini za koju mi mala cilo vrime da je bundeva,e nije nego tikva,bundeva,tikva,bundeva,tikva…
Znaš šta mala ili je tikva ili nima strašila. Dobro tikva. I išli mi sad nač di ima tikav.Satralo nas je,sve nike moderne, đentilaste, iste, ka da ji je kloniralo,sa obišenin brošurican na kojiman je nacrtano kako ji u strašilo učinit. Sve smo obašli i jedva našli onu pravu veliku,jemala je oko devet ipo kili. Kako san prolazija kroza ovi trgovački centar (koji su isto tako blagodati zapadni demokracij) svi su gledali u otu tikvetinu ka da je koje novo svjesko čudo.

I eto došli mi doma i nacrtali di ča triba izrizat jučera uvečer u nju mekli luminaciju i sve je bilo spremno za dočekat noč od vištic ili kako to oni na zapadu rečedu Halloween koji je najluđu zabavu jema u Los Enđelesu di se na ulican skupilo okolo pola milijuna maškaranoga svita,a i u nas po razniman kluboviman su se organizirale maskirane zabave na kojima ko je od sebe učinija luđega zombija bija veča faca.
A osin Halloweena u nas je i ove treče godine po redu od strane crkve bila upriličena Noč otvoreni crkava. Inicijativa je krenila iz Vatikana ka bojkot za noč vištic. A sad mene interesira di bi po ovomen mogli smistit one šta su najpri išli na Noč otvoreni crkav,a posli toga na proslavu noči od vištic,šta oče reč iskočili iz Holliveena i uskočili u Halloveen?