A lipo. Tako je bilo teplo da su se ljudi skidali u majice,ispod kap se znojilo,a rukavice su mečali samo oni ča su skijali.
A sičan se prvoga puta na Kupresu kad je bilo minus deset,a snig je kako je puvalo pada vodoravno,ali je to bilo u prvi misec,a ovo u treči misec do sad nije falilo e.
A samo ča san uša u Bosnu nakon niki po ure isprid mene stoji njijov policajac sa lizalicon. Dobar dan,dobar dan,molim dokumente,evo,i sad on to gleda i pita me da je li znan ča san učinija,a ja njemu da neznan,a da san vozija šezdeset i pet,a da je na znaku kraj kojega san proša pisalo četrdeset. A di je oti znak,nisan ga uopče vidija?i zašto je ovde ograničenje četrdeset kad nije naseljeno? To van je područje ka da san vozija doli na Jugovinilu.

Je govori on,ali to je naznaka da je blizu naseljeno područje.Naznaka da je blizu naseljeno područje,a u nas u Kaštila kroz naseljeno se more pedeset vozit i govorin mu da stvarno nisan vidija oti znak jer da san ga vidija onda bi bija vozija samo deset više od otoga na znaku,a onda se i ona moja javila,je,je on van se pridržaje znakov i cereka se ma di je tebe uvatilo,a uvik mi govoriš koliko vozin,a ja policajcu govorin,sriča da san ja vozija,a da je ona bila za volanon pa bi radar od vitra kolikon bi brzinon prošla,a ona me bada,ajde muči,a ča ču mučat šta te briga vidi da je mene fermalo,ne tebe,a ovi se smilova i reka,dobro ovi put ču vas samo upozorit,a dalje nastavite pažljivo.

I sad meni nije da vrag mira i tija san se vratit nazad za vidit oto znaka o kojemu mi je on govorija,a kojaga ja nisan vidija za uvjerit se da je stvarno tamo jerbo mi nije jasno da ga nisan vidija,a ona mi govori da ča san se uzgovorija i tako te pustija lišo pa ča te sad briga je li jema oli nima znaka. A kad bi ja sad tija znat je li znak tamo,a ja mislin da nije.I oču li se vratit,neču li se vratit,oču li neču li?A eto nisan,a bilo bi bolje da jesan pa bi sad bija miran.