Danas okolo jedanajst manje kvarat na rivi je bila velika strka jerbo kako su se dva policajca zaustavila sa motoriman i počela pisat prijave sa svi stran se počelo trčat i micat aute.Bilo je tot sad raspravljanja o ovomen i onomen,ali pošto je znak tot zna se da si u prekršaju i svaka polemika oko toga je suvišna,akcija je od prisutni prihvačena sa oduševljenjen.E,a sad kad su policajci završili posal na rivi onda su sa istin poslon nastavili na potezu od onega puta ča gre od škole i križa sa onon ceston Sokolana-riva,jerbo od toga križanja pa do crikve je isto tako znak od zabranjenoga zaustavljanja i parkiranje.

Za razliku odo tamo na rivu di su vlasnici o aut bili u kafičiman i mogli vidit ča jin se sprema,ovde je večina nji bila u crikvi i nisu vidili da jin se pišedu kazne.E,sad pošto san to vidija reka san šjor policajcu da mu se ne želin mišat u posal,ali da su ti ljudi u crikvi pa ako bi moglo ka je li ono,a šjor policajac je bija vrlo susretljiv sliježe rameniman i kažije mi na znak,malo smo pričali i sve je na mistu ča je čovik reka i mislin se ča ču učinit,pa san odlučija onako u kratke gače uletit u crikvu i obavijestit koga san zna,a onda su ovi drugi dalje koga oni znadu rekli tako da su najedanput iz crikve ljudi počeli trčat za maknit auto,a mene su pojedinci gledali onako prikooka,kako san vaki uša,a šta ču,neka mi Bog oprosti,eto,smatra san da triban ljudiman reč,a kako če to ko objasnit neka objasni.

E onda je posli mise nastala kanonada nezadovoljstva,šta se sve moglo čut o tome nebi,jerbo su ljudi ipak izašli sa mise,ali da se ništo po ovomen pitanju triba učinit,triba,jerbo ljudi kad dođedu na misu nimadu di sa autan,a s druge strane morate svatit i policajce,tu postoji znak i pravila su jasna,ljudi radidu svoj posal. Šta se more napravit? Možda to da Grad Kaštila sa prometnon policijon napravi neki dogovor da se nediljon na ota i ota mista od te i te ure,do te i te ure more parkirat jer se tada održavadu mise.I da se na ove postoječe znakove stavi ploča sa označeniman uran i danon kad oto važi?