Danas je okolo dvi manje dvi-tri minute učinija puno lipi potres. Sidin ja u fotelju kad čujen ništo ka eksploziju,a ona moja če da ča je ovo? ma ništa,ovo tučedu mine u kavu,enti ča se čuje,obilato su ovi put mekli,a ona meni, ma koje mine?oli ne vidiš da se sve trese?a evo vidin i ja sad,ajme,a ča je sa dicon,bižimo iz kuče i vazimljemo mobitele,ona zove maloga,a ja malu,dobro je,sve je u redu,dica su vanka škole,a malo kasnije zove me mala da ji je pustilo ča doma,a kad san doša isprid škole tamo je bija opči metež,roditelji u panici kupidu dicu,ravnateljica, učiteljice,nastavnice-ci,otvaradu imenike,rastižedu spiskove sa brojiman telefoni,mobiteli…zovedu roditelje koji nisu došli po dicu da jesu li doma,jerbo škola odgovara za dite koliko uri po rasporedu jema,pa sad ne moredu dicu poslat ča,a da jin doma nima nikoga,organiziran je i prevoz za dicu putnike,puno je tote bilo posla,velika je to odgovornost.

A mene zove jedan na mobitel da ča se meni čini,kako mi je ovi potres parija?a meni je to parilo ka nika velika podzemna explozija,govorin ja njemu,a on meni,je baš tako,prisiča se on rata i veliki bonbi ča su okolo njega padale i govori mi da je on u ovomen čutija ka dvi explozije,a ne bija ti ja lin pa posli toga razgovora okrenen đoker zovi,oti sve zna,pa ga pitan je li se njemu ovo čutilo ka nika explozija,a on če,je,kako se sve skupa dogodilo nije baš tipično za potres,ali on je odma odbacija bilo kakvu exploziju,i reka mi,ovo se siguro pomakla takozvana Jadranska ploča,kad nakon desetak minuti na radijo govori upravo ono ča je ovi reka,pomicanje ote Jadranske ploče donilo nan je potres od 4,6 po Rihteru i to u epicentru između Čiova i Drvenika,ali svit više ništa ne viruje,a pravo da rečen,ne virujen ni ja,nagleda san se pusti filmov na vake teme,razni armagedoni i ostala čuda,a tri dila onega ča smo vidili na filmoviman sad gledamo u zbilji i zato ti u timan momentiman svakakve pizdarije padadu na pamet,pa neka mi govoridu,vidi ovega, sad bi on o teorijaman zavjere, a i samin tin i ča se na radijiman prilično dugo čekalo da nan se reče di je pleslo i ča je to bilo,pa je prva informacija krenila s epicentron nigdi u Bosni za da bi se kasnije ispravili i rekli osan kilometri zapadno od Splita,na dva kilometra dubine,a nakon toga je usljedila objava da je potres bija tamo između Drvenika i Čiova i to na deset kilometri dubine.

A da ja baš ne fantaziran ča se tiče ovega potresa ča je parija ka jedna veeelika podzemna eksplozija potvrdilo mi je i to šta nas je nikoliko desetak minuti nakon potresa zvala jedna žena koja stoji na desetomen katu od nebodera i pitala nas da ča je ovo bilo? govori da je čula niku exploziju i onda se sve zatreslo,a inače,do sad kad bi bili potresi onda bi se oni uvik gingali,ovi put nisu.

Eto,bilo ča bilo,ovi put smo koliko toliko lišo prošli,iako sad sa svi stran dolazidu dojave o razniman napuknučiman,a ispada da je puno toga bilo od prije,ali nismo odili za otin,ali je sigurno,da je sa akvadukta koji je učinjen u doba Dijoklecijana,a s kojin se Split napaja vodon otpa lipi komad kamene gromade cca.osandesetak kili,ka i komadiči kamenja,pa govoridu ovi jedni ča su tote bili i znadu kako je to prije bilo,da se vididu pukotine koji dosad nije bilo,e sad je li se i tote radi od ničemu ča je bilo pri pa se nije išlo za otin,ali je činjenica da je oti akvadukt od velike važnosti za grad Split i da ono ča se vidi golin okon,zvoni na uzbunu za šta hitniju sanaciju.

A u selu,ča je u nas oti potres učinija? iša san se zaletit do sela za vidit jema li čako i eto me doli na rivu,stoji nji pet i pitan ji,ča je, je li čako?,a oni svi prston prema staremu kanpanelu,a ne vidin ništa,a oli ne vidiš da je ferma sat,(taman ga je bilo nariktalo oni dan kad je bila godišnjica od bonbardiranja) i gren ja to slikat i vidin kroza objektiv niku čudnu uru,sta je u jedanajst,a potres je bija u dvi manje dvi-tri?nema veze,napiši ti,govori nji pet,oli če ko ič za otin,a u međuvrimenu prolazi jedan i govori,hebate luđakov,ma dobro ste vi rekli slikaču ga,a sad neka koko dokaže da to nije zbog potresa,kako životinje čutidu ranije da če bit potres pa se uznemiridu,ova jedna da jon se prije potresa mačka uskomešala i grebala po vratiman da oče vanka,a ovi jedan da su se njemu pri udara ribice u akvariju sve zbile u jedan kantun,a pošto je ovi naš sat učinjen od visoko sofisticirane elektronike,zašto i on nebi čutija,pa se lipo navrime ferma,samo da ne budemo opet čekat misec daan za da ga uputidu.

Zanimljivo je i puknuče cijevi od vode ča gre priko Starčevičeve ulice koje se primjetilo tek par uri kasnije,a isto tako,osandesetak metri odo te cijevi i iskakanje vode iz jednoga hidranta,a još zanimljivije je da se odo toga hidranta u nekoj blagoj dijagonali prema sjeveru u razdaljini od jednu niti stotinjak metri nalazi jedna kuča za koju je govorilo na radiju da ima oštečenje zida,pa jema bit ništo i sa fumaron…,a kad bi ote tri točke iša spajat,dobija bi niki oblik sličan trokutu…?
Pa je onda jednomen u selo pa luster sa plafona itd.

Eto tako je to u kratkin crtan bilo,ljudi su prestravljeni,a kako se čujedu priče, puno nji če ovu noč probdit,a oni ča čedu leč spavačedu sa jednin okon otvorenin i bit obučeni za ne gubit vrime,ali, ostaje za nadat se da je ovo sve i da čemo za dugo vrimena, ča se potresi tiče bit mirni.