Taman jutros kad je tribala počet misa počela je rosikat kišica,ali je nakon par minuti stala i iako oblaci baš nisu obečavali,kasnije je učinilo i sunce,posli mise,tamo okolo podne ipo na peškariji se dilija orzo sa suvin meson,ali ovi put spizu nisu dilili političari (lani Petrov,Orešković,Baldasar…),več volonteri,a tamo nigdi u isto vrime tribala je počet i utrka osmerac između Oxforda,Cambridgea, i Gusarovi legendi u kojoj je Oxford pobijedija. I premijer Plenković je uspija doč taman malo posli nego se označija početak prve trke, koji je nakon nikoliko zaveslaji poništen,pa je nakon par minuti opet dat znak za start,a kad je utrka osmerac završila Premijer je sa svojiman iz pratnje vrlo brzo napustija rivu.
Ove godine prve trišnje ča uvik startadu okolo Svetoga Duje,su dvadeset kuun,lani su bile trideset,a ka po običaju drvenarije je bilo na svakomen kantunu,a u narodu je po predaji, u tradiciji ostalo da se na ovi dan mora kupit ništo drveno,a ima i tumačenja da se na Duju obavezno triba vazest vrijača pa da čete onda cilu godinu jemat šta za u teču skuvat.

E,a, popodne je bila i tradicionalna tonbula,na kojoj se,to je več tradicionalno, priko mikrofona zove da dođedu po dite koje se izgubilo,pa je tako bilo i ovi put,došla je mater od diteta i rekla da je otac kriv,nije ona,e i sad oni šta je vodija tonbulu, ka maloj dici mora je po nikoliko puti ponovit, najpri se igra do terce, to je kad tri broja ispadnedu u istome redu,pa onda gre cinkvina to je kad ispunite jedan cili red i na kraju tunbula, kad se ispuni cila kartulina. A je govori ti govori. Izvuklo tri broja i nji par več trčedu prema bini,asti kud pri ,a ja deboto pa nisan još uspija ni vidit kartelu i je, nji troje podililo je dobitak od pet iljad kuun.

I onda jin ovi lipo govori, sad kad je pala terca, sad gremo na cinkvinu, to van je kad se cili red ispuni. Nije ni počelo izvuklo je biče dva broja eto trče niko čekaj čekaaaaj,asti,a ča je sad, oli je več cinkvina pala? Nije ovi je skupija tek tercu,e i onda je opet tribalo objasnit da se sad bla,bla triba ispunit cili red bla bla cinkvina,bla ma zaludu, ka da u ariju govoriš.

E i eto na, pala je i cinkvina,ajme nije,a ovi je mislija da je, pa je ka malo od velike uzbuđenosti falija,a ono čuješ okolo beštimlje odnija ti vrag bip,jebenti bip tebi i ko te je doveja bip,bip itd. E i evo je na, zapravo je pala, deset iljad kuun dobila je nika žena sa troje dice, e i sad opet ovi ča vodi govori, cinkvina je pala sad gremo na tunbulu,a to je ono kad se ispuni cila kartela bla,bla. Ma za ludu, nije palo dva broja eto ti se opet niko javlja, dobija, dobija san,a ča si ti sad dobija nesričo jedna,vidi ovega ko ga je obuka pari ka arlekin, jadna zemljo ko te gazi, vidi,i onda čemo mi naprid i dobro nan je kakovi nas sve jema, bili su tot još razni uvridljivi komentari za sve one ča su vikali da su dobili cinkvinu,za koju je voditelj miljun puti objasnija da je pala,ali ljudi u žaru igre i ne čujedu nike stvari,a i mora se razumit,svak bi tija pineze u žep spremit.

I na kraju eto tunbule počeli su sad svi brontulat,e bože falija,e ja čekan jedan broj,ovi dva broja,ova misli da je i ona dobila,a je li pa oni broj,a ovi broj, od grinte se kidadu lističi,ovi viče kako je oni moga dobit,a ja još nisan ni pet broji zaokružija itd,itd i to je to, do drugega puta,a ne moredu svi dobit, ovi je put jema sriče šestogodišnji David sa Brača koji je u žep meka dvadeset iljad kuun.