Eto na,nakon jučerašnjega pikamiranja danas se nakon ča je sa bivšega pazara otuklo cili beton otkrilo da jema doli niki naslagani stinj i kako to več gre,eto i oni sa pinelčičiman,špatulan,metriman,strelican,aparatiman koji čedu to sve sad lipo u libre skicirat,fotografirat i onda če tek nakon toga moč krenit radovi.

E,a sad ka po običaju i okolo ovoga je u selo bila prepirka ,a to Van je bilo ovako,ovi jedan ča je sidija na šentadu tamo doli na rivu di je “modna pista” je tvrdija da je on u bolnicu leža sa jednin Jerkunicon koji je njemu govorija da je tote bila njegova kuča,ma ča ti znaš,ajde doli oklen si doša (iz donji Kaštili) javija se drugi, ča je sidija na šentadu isprid pekare, ti češ meni govorit,nije tote bila njegova kuča,nego popova,a onda se javija treči,ča je sidija na klupu tamo kraj peškarije,nimate pojma ni jedan ni drugi,a ča je reč,ti češ mi govorit, govori njemu ovi drugi,jema san ja onda osan godin pa znan,a ti ča se nisi onda bija ni rodija ispada da si stariji od mene,a,ma nisan ja stariji od tebe,nego san čita u knjige,a tamo piše da je ovde bila sakristija… I tako je to bilo u nedogled,bome lipo su se između sebe častili,nebi ni pas sa maslon izija,a onda kasnije opet jedan dolazi i govori da je tote bila sakristija i da se odatle skalan penjalo do kora u crikvu…

Ovo gori je bilo okolo dvi ure popodne,a ujutro je jedan reka da nebi on to više ni betonira,nego bi iskrenija par kamijoni zemlje,pa da bi tote učinija vrtal i kupciman bi se bralo odma na licu mista, friško.

E i sad san ja izvuka ovu jednu sliku dokle crikva još nije bila bonbardirana i gleda san je na povečalon i bome osin jedne sitne male građevine sa južne bande uza crikvu,koja bi možda mogla bit sakristija, ne vidin ništa drugo?

Evo na ove dvi slike pa morete vidit kako je to bilo pri bonbardiranja.(govori mi ona moja kad je vidila ovu doli sliku u desnomen kantunu,da vidi koliki vapor,ama nije vapor,nego fumari,koji fumari od fabrike,asti)

A ovako je izgledalo posli bonbardiranja:

A na ovu doli sliku morete vidit livo od ponistre,navr slovi (sucurac.com) kako se na zidu vididu obrisi od nikoga krova,a tako je i sa južne strane ponistre?

E ovi bi temelji na ove dvi slike tribali bit odo,ka ča govoridu, sakristije,ma mi paridu veliki s obziron kako se to vidi na staroj slici:

A ovi je zid vamo dalje na zapad,pa smo mi stručnjaci zaključili da biče to od obale,jerbo je odma do crikve bilo more?

I po tlocrtu crkve samo se vidi oni mali dijal sa južne strane,ka ča je i na slici.