Nakon ča nan je napunilo glavu kako je oni nevaljali socijalizam zločesto društveno uređenje “dobili” smo demokraciju, uz koju smo sa zapada “uzeli” sve ono najgore,ča nan je kad smo gledali na filmoviman bilo nestvarno i mislili,ma to je samo film,ali nije,jerbo smo te “blagodati” o ostajanju bez imovine,kopanju po kontejneriman,blokiraniman računiman,dobivanju otkazi priko sms poruke…,osjetili na vlastitoj koži,pa nan je onda reklo kako više nima samo njega i nje,več smo dobili i ono,pa nan je uvalilo i Valentinovo,Noč vištic,pa nan to sve nije bilo dosta i onda nan je poslalo crni petak,iliti ga black Friday,di npr. u Jamerikan,odakle je pri sedandesetak godin sve i krenilo, i po nikoliko daan čekadu isprid dučani u kojiman su ništo zacrtali za kupit i ča se ovi dan spušta i za devedeset posto,pa puno nji u šatoriman zna spavat za da ujutro u raniman uran kad dučani otvaradu budedu među prviman,a to kad otvoridu vrata od dučani, bude opči kaos,svi na jarpu ulječedu, rušidu sve prid sobon,a za doč do stvari koju mislidu kupit,se puno puti i potučedu,a u potizanju znadu oto i raskidat ili,razbit…

Ali naravno ka ča kod nas nisu došle velike plače,isto tako izostali su i veliki popusti,tako da se u nas i dalje nastavlja sve po staromen,onako ka ča je i bilo,pa tako u odnosu na nji koji imadu velike plače i velike popuste,u nas smo mi to preveli na male plače i male popuste,pa se ote kupnje odvijadu skoro pa ka u apoteci,nima divljanja,beštimanja,guranja,tuče,nismo mi divljaci ka oni tamo…mi to sve lipo u fino činimo,a ča se popusti tiče,uz one natpise da je popust – 20%,najviše jema natpisi kako je popust do – 50%,jupiii,sve je minus pedeset posto,a ono kad greš platit onda isto ka da te plesne,puno nji se pozove na ono ča zna na ulazu pisat i nikako da jin dođe do glave kako je ono (do) u natpisu presudno,a pa onda evo npr.ča san ove godine vidija,ono ča je označeno sa točkon na etiketi je sa popuston od četrdeset posto,aj baš lipo,dobar popust,nima se šta za reč,je,da kod nas nima onega ali,pa tako kad dođete na blagajnu oti popust vridi ako uz oto ča van se svidilo i mislite kupit,morate vazest još jedan komad robe, koji isto tako jema otu točku na etiketi,jerbo se tek onda,kad vazmete najmanje dvi stvari sa oton famoznon točkon,konta popust,ma čekaj malo,a kako to niste napisali,jesmo,jesmo,pogledajte na tabelan po dučanu,a pa ideš vidit i naravno,oto -40% se vidi iz avijona,ali u nas po običaju,ono sitnije napisano je presudno,pa je tako bilo i ovi put,ali čekaj malo,meni ne triba oti drugi komad robe,več samo ovi,a šta ču Van ja,takva su pravila,ali…,nema ali,ako misliš uštedit na tomen komadu robe,moraš vazest još jedan komad,neka ti ne triba,ali nema veze kad san jeftino proša,samo ti misli da jesi… 😀

I sad se dokle ovo pišen,ne mogu ne zapitat,a ča nan je sljedeče ča čemo od zapada pametnoga priuzest?
Možda čemo počet činit paradu za svetoga Patrika?
A tili smo samo demokrasku,pravednu i pravno uređenu zemlju i plače ka ča jemadu oni tamo u zapadniman demokracijan.