Ovo kako se bližidu izbori za mjesni odbor triba več sad vatat pozicije,triba učit od oni „veliki“,uvik se prid izbore sastajedu sa poznatiman,pa onda oti poznati ništo o njima govoridu…, gren i ja čako smislit.
I pala mi je ideja da bi bilo dobro se nač sa Britanskon kraljicon,gleda san ko jema koga za da me more turnit i eto za nikoliko daan poziv,da se nacrtan u Londonu pa ču sa kraljicon popit čaj.

Spremija se ja i za nikoliko uri eto mene na njiovomen aerodromu,naravno,padala je kiša,a ima san par uri vrimena do susreta,pa san malo učinija đir po gradu,zbog radov je Big bena umotalo u plastiku,odma me štufalo,pa san se polako s noge na nogu uputija put palače.

I evo,doša je napokon i ti momenat, kraljica tamo,a ja vamo,mora san stat na nikoliko metri daleko radi korone,tako da nisan moga sa njon selfije učinit,ebnti sriču,najpri nisan uspija učinit sliku Bigbena,a sad se ni sa kraljicon ne mogu slikat, ali da ne ispadne kako lažen,slika san kako me čeka u svome zimskomen vrtu,pričala je na mobitel.
Dalo mi je čaj, kad san srknija,bija mi je nikako čudan,parilo je ka da je ruski,pa san pita mogu li ja dobit kalumelu i tako je krenija razgovor,pozdravili smo se,a onda krenili sa pričon,naravno,najpri san pita kako je sa zdravljen,to nalaže kultura,a onda je počelo kako vrti ovo,pa vrti ono,bolidu kolina,pa smeta dok gre,a onda san i ja spomenija kako i mene gnjat okriče i jedva san učinija skale…

Ali brzo smo se pribacili na Sučurac,rekla je odma da me neče ništa pitat o problemima,da čirne ona na sucurac.com,pa sve zna,pitala me je ča je sa onin potokon kraj anbulante,je li pustilo vodu…
A nakon ovoga uvoda krenili smo na malo ozbiljnije teme,ali Vas to siguro ne zanima,pa Vas ne želin sa otin zamarat…
Eto.
Inače izbori za MO su tamo nigdi ili deveti ili deseti misec.