Ma to ste Vi u glavi stvorili krivu percepciju,meni znadu reč kako sve gledan crno,rođeni pesimista,dok je u drugi čaša napola puna u mene je obratno,napolak prazna,ali vidin ja da jema puno pesimističniji od mene,evo npr.ovo bidnega starega kanpanela u našemu selu pokrivenoga raznoraznin raslinjen,ja uopče ne gledan ka da je On zapušten,sad če koko reč,a ča mu je oli je poludija,a ne,obalazeči bjelosvjeske destinacije u svojoj glavi san stvorija sasvin drugu percepciju i mogu reč kako smo mi u selu sa našin kanpanelon u samomen vrju trenutačnoga globalnoga trenda,jer neznan koliko znate ,ali npr.eto ja slučajno znan,jer san tamo pri jednu pola godine bija,da je med kojega su pčele učinile usrid sride Pariza po cijeni deboto ka Sveto uje,jerbo kako jemadu jaku poljoprivredu,pa je sve prilično zatrovano pesticidiman…,a ovi takozvani Pariški med je izvan ote zone zatrovanja, ekološki,da ekološkiji ne more bit,jerbo pčele letidu od zgrade do zgrade koje na svojiman najzanjiman katoviman jemadu prave šume,a gori nima pesticidi,nima ni smoga, jerbo je visoko…samo zdravlje na vrju zgradurin usrid sride Pariza,e i sad,zamisto da nan je drago kako je i naše selo uz bok sa tako velikiman gradoviman,po selu se more čut kako o bidnemu kanpanelu niko ne vodi računa,a ja bi iša u drugomen smjeru čak pridložija da bi,ne ovo lito kad nas plesne ono zvizdana i sve užge,več bi to tribalo odma počet,da se svaki dan koko popenje sa biduničen i zalije ove biljčice,jerbo če kako to več svake godine biva,na oto zvizdana izgorit i osušit se,a šteta…

Evo npr. na ove dvi doli slike vididu se razne biljčice koje su u podanku več počele žutit,a pa bi bilo šteta da ji se ne zalije,jerbo če do koji desetak daan,ako nastavi ovako bez kiše sve vrag odnit…

Iliti ga ova smokva,ako nije ona rana,petrovača,več ona kasna,koja prispije početkon osmega miseca,ako se koji put ne zalije,neče moč izdržat na litnju vručinu,a da se ne osuši,a šteta bi bilo ne ubrat koju kad je več tote,jedino se moremo uzdat u to ča je sa sjeverne bande od kanpanela,pa neče bit na direktnomen utjecaju sunca…