Naravno,opet karba i okolo ovega pitanja,ali čekaj malo,ča onemu koji ga je itnija na Tri kralja,smeta oni ča če ga ostavit recimo, do petoga miseca,ali oni prvi ne more,a da ove druge ne naziva pogrdniman imeniman, “uljepšavajuči” to sve sa ukrasniman pridjeviman…?
I dokle ga jedni itadu odma ujutro na Tri kralja i to se potrudidu da ji svi vididu kako su to učinili,(pa tako moremo vidit kako ji u Splitu itaju sa neboderi),ovi drugi ča to ne činidu,kakluliradu,ka nebi tili da se zna kako ga nisu otkitili,a tili bi ga ostavit,vrlo zanimljiva teza,a ljudi moji je li Vi oto bora mečete za radi sebe,oli koga drugoga?

Lanpice vanka,po običaju,zanji put goridu na sama Tri kralja,dok ji neko več udunja i dan ranije,a ča se tiče unutrašnji dekoracij,drži ji svako,onako kako mu paše,od oni koji ne skidadu bor na sama Tri kralja, jema oni koji obavezno oti dan mičedu jaslice,a jema oni ča ji uopče i ne mečedu…

A pa onda jema oni ča držidu bor do prve nedilje nakon Tri kralja,jerbo je to blagdan Gospodinova krštenja.
A isto tako bor se more držat sve do Sviječnice¸iliti ga do drugoga veljače,dokad stoji okičeni bor i u samomen Vatikanu,a s ton prakson se počelo nakon ustoličenja Pape Ivana Pavla II.

Eto,toliko o podaciman šta kako i do kad,ali naravno,svako od nas če bor držat onoliko koliko mu odgovara,a kad ga je lipo za vidit,a ne smeta,pa neka stoji dokle stoji,jema i oni ča ga držidu skoro pa sve do Uskrsa.