Ka šta več od prije znate Domina,Mandina,Kate,Marijeta i Filomena su lokalne lajone koje se svake nedilje zajedno nađedu na kafi i pritresedu sve ono šta se je prošle sedmice u nas događalo,pa i više od otoga. Samo nebo jin je granica.

Ma oče meni koko reč zašto ona jamerikanka šeta po Hrvaskoj i govori nan kako bi mi i ča bi mi sa dicon tribali činit? Ovo je prvi put da san čula da prevencija more dat niki negativni učinak. Kako se more dogodit da ako dica u školi učidu o spolnin bolestima da če onda oti boleštin bit u porastu? Ili npr. učenje o kontracepciji za sebon nosi više abortusi? Je Domina, tebi to sve pari tako jednostavno,ma ti se u to ne razumiš ona je ipak jedna školovana osoba koja o tin stvarima puno zna. Dobro je Kate, šta su onda oni šta su pisali ovi zdravstveni odgoj? Ne moreš reč da oni isto tako nemadu velike titule koje stojidu iza njijovi besid. Ma kad bi ja sad sa njon mogla razgovarat pitala bi je kako se to u nji u Jamerike dogodilo da su jin se dica otela kontroli? Sad su se sitili da bi ji šta ranije tribalo pripremit na zabrane i prisile, jer sad jin se dogodilo to da ispada kako su dica šefovi, a ne roditelji. I sad su se domislili organizirat tečajeve parentinga (roditeljstva) kojima je cilj vratit kaki taki balans u hiperprotektivni i ekscesivni odgoj koji kao posljediju ima emocijonalno neuravnoteženu dicu.

Šta je? Šta ste zinile? Lipe su van plonbe. Ajme, šta ti Mandina lipo govoriš, guštamo te slušat iako te ništa nismo razumile. Naravno,naučila san i ja posal. Triba upotrebljavat šta više strani i konplicirani besid i svi če u tebe ka u Boga gledat i govorit koliko si pametan. Vidiš po televizijan,kad novinar postavi koje pitanje,a onda sa svi stran počnedu prštat razne fraze za koje da bi ji razumija tribaš riječnike kraj sebe tiščat.Je Mandina, Bog iz tebe govori, ma da ja sad ne vazimljen riječnik bili ti nan u kratkin crtan objasnila o čemu si ti to govorila? A Filomena moja, govorila san o tomen da su dica u Jamerikan u nikoj stvari i da sad gledadu kako če ji vratit nazad?

Ajme koja teška tema, ajmo mi na čako ležernije.
Jeste vidili,an? U petak su na sokolanu učinili predaju seoski ključi, Bonacin iz MO da je ključe Bonacinu iz maškar. Asti pa ča jin je tribalo za to monade činit moga mu je bija i doma donit. Ajme Filomena uvik jemaš ništo za brontulat, eto napravilo se je, lipo su se družili, proveselilo se je, i šta je u tomen loše. Dobro ti Marijeta govoriš,a u ponediljak moredu lipo učinit feštu pa i ključe o javnoga zahoda razminit.A šta je reč Filomena? Ni tebi ništa nevalja,najpri si nikidan rekla da ajme mrtvoga sela nigdir se ništa ne događa, sad kad se ništo napravilo opet nevalja,a ko bi tebi udovoljija?
Ajme evo opet nji dvi, ma jeli se za svaku morate vatat? U svemu politiku vidite.Ne vidin ja Marijeta svugdi politiku, nego čega se ko uvatiš jema veze sa politikon, jerbo nije zaludu ona ako se ti neš bavit politikon, ona če bavit sa tebon.
Zato ti Filomena od onoga tvoga Milanoviča stranka lipo kotira, jemaju najniži rejting od kako su na izborima dobili vlast. Ajme evo ji opet, a jeli morete… Ti Mandina muči, oli češ mi opet doč šta je Lesar reka,a šta je reč Kate, a kad ne more svak bit na prvo misto ka oni tvoj Karamarko. Eno je skinija Sanadera sa trona najnepopularnijega političara pa je sada on na prvo misto. Jeli, to je sve namiščeno, a šta je reč za jedne je namiščeno, a za druge nije.A da se vas dvi prestanete prestanete karat, a šta se ti Domina mišaš vidičemo šta če sve ona tvoja Pusička za uč u Evropu sa Slovenciman učinit? Ne miriše mi na dobro.A jeli Kate, a kad zamisto da je sve to u ove godine dovedeno u red sad ona u par miseci ka da je Koperfild mora sve sredit. Ajdete lipo kvragu pa jeli se morate svaki put okolo politike raspištoljit. Opet se Marijeta javila, a o čemu bi ti o snimanju Ruže vitrov zamalo su me zbog tebe potirali jerbo oto jezičine nisi mogla zauzdat.Ma jeli Filomena, nisan ja kriva nego oti tvoj mili glasič jemaš ga za da bi mogla mine vikat. Ajme meni ma vidi ji ka u kokošinjcu. Ajde smirite se, ajmo ča o oniman novima govornin automatima za molitvu govorit. A šta bi na oto tribalo reč? Da oni priobračeni sad priko mise na mobitel more zvat kad mu usrid molitve zapne?Jo tebe Filomena šta si zajedljiva, to je tako normalno i crkva ide u korak sa vrimenon.

Ka da neznaš da su se prije mise na latinskome govorile,a sad na našemu, a pop je okrenut prema narodu, ne ka prije, prema oltaru. Svako vrime donosi novine i mora se ič u korak sa njima i to je tako. Jeli? A sad bi ti ja Kate ništo rekla ma neču jerbo bi se do ujutro karale.Jeste li se vas dvi napokon išvogale? Nikako da van ispričan ono kad san nikidan kod čere bila u Zagreb išla san na humanitarno gađanje Bandiča. Moga si ga gađat grudan sniga, s tin da je svaka gruda koštala pet kun, a sve je to išlo u humanitarne svrhe. I jeli se skupilo pinez?Da skupilo, u koloni se strpljivo stalo neka je temperatura bila u minusu.A Mandina očeš nan reč ušto si ga gađala? A kad ti neču reč.

A da znaš da bi i ja ovod u Dalmaciju uvela tako itanje,samo šta mi nimamo sniga,ali nema veze, jemamo mi našu autohtonu stinu. Evo ja bi dala i pedeset kun po stini kad gre humanitarno. A koga bi ti Filomena da ti se namisti za pogodit ga. Mandina,a kad ti neču reč.Ka tribalo bi puno pogađat. Je li Kate, vidin ja da si i misli počela čitat. Nisan,ali znaš onu ko te nezna skupo bi te platija. Za to bi se za te Kate gracali. A jeli? Evo ji na opet. Ajde te lipo obe… Nego ča čemo sa drugon nediljon očemo se nalazit jerbo su nan u selo maškare.A dakuče nego čemo se nač, A jeli ti Kate moreš bez otoga jes is hausis? A Mandina kad se moreš ti itat sa besidan mogu i ja. A šta če bit krnje? A moredu šta očedu ima široka lepeza. Smanji tu svoju lepezu, zna se ko nesmi gorit, a od ostatka čedu izabrat trenutno najpovoljnijega. Možda pošto je kriza izberedu kojega unjuloga da ne trošidu puno na materijal. Znači načemo se? Je, moremo i Mašogadur prolistat.Samo da nas više ne budedu potresi drmat.Samo nan je još i to falilo. Aj adijo Van.