Jupiiiii,počela je predizborna kanpanja ,bilo bi najbolje je prispavat,ali eto, morat čemo pritrpit ovi petnajestak daan kad čedu se kandidati između sebe natjecat „ko če dalje pljunit“,ča oče reč da če u ove dane od kanpanje bit ajme i kuku, ono sve najgore ča je u čoviku, najedanput če se razgoropadit i zavladat, tako da se u dane od izbori prijateljstva rušidu ka kule od karat,a ne mali broj je svađi i unutar sami familij, ( kad je ovi jedan naza četiri godine bija reka da jedva čeka kad če proč izbori jer jema več deset dan da ji samo sendviče,jerbo je žena za sdp,a on za hdz)

ali, ovi drugi je zato reka da je njemu drago da je to tako,jerbo se u ote dane more čut i ko i di i kako i koliko i na koji način…, izlazidu na vidilo i one najmračnije tajne, koje za potribu izlazidu na svitlo dana i sad svak za nji zna,sve ča se more protiv koga iskoristit za onemu drugomen napakostit odma izlazi vanka,nima brenzavanja, onoga sa suprotne bande vata se za svaki zarez,točku ili krivo izrečeno slovo,jema bit da se snimke i po nikoliko puti privračadu i raščlanjijedu se beside nebi li se našlo čako da je ko ča krivo reka,za da bi mu se ka bumerang vratilo i opizdilo, pa tako ispada da doktor od ekonomski nauk nezna učinit račun koliko je to dva posto od PDV-a ili BDP-a,presjedniku jedne stranke se rugadu da nezna koje su mu programske točke ,a jema ji samo pet ,pa onda jema i dosjetki,tako je Milanović poručija Karamarku da če mu omogučit da lipo uživa u blizini svoje kčerkice koja se nikidan rodila…, pa se onda karadu okolo bidni izbjeglic i okolo toga ko je zaslužan šta su nan Mađari vratili vlakič,a programi se najmanje spominjedu, oni su pali u šezdesetiosmi plan.

A ča je sa oviman drugiman strankan? one ča su prije i po nikoliko desetak mandati dobivale,više ne gredu same,sad su pod kapon ovi veliki,ali, zato jema niki novi lici,koji se moradu cilo vrime laktiman turat da bi se nikako za nji čulo,da bi i oni mogli ugledat svitlo koje do nji jedva dopire,pari mi ka „borba“ mali kuuč potleušic koje odoljevaju oniman velikiman neboderiman i prkosidu vrimenu i prostoru,ne dadu se, pa tako ovemu jednomen odo ti „mali“ ča su se pojavili,samo ča je uspija uvatit mali tračak svitla, uspravit se i udanit zraka,odma su ga tili pokotušit i našlo mu je niki dvadeset iljad euri ča je uložija u kupnju kuče i zamisto da sad Hrvaskomen puku objašnjaje na koji bi način svoje znanje koje je pokaza ka uspješan gradonačelnik pritočija u rješavanju problemi na nivou države,sad mora objašnjavat okle mu pinezi …

Ali, eto, bilo kako bilo,priživit čemo i ovu,ka ča smo i sve one kanpanje prije ove i ja bi priporučija da se ne nervirate, nego se lipo uživite u priču i guštate u pustiman obečanjiman o dizanju BDP-a kalavanju PDV-a i ostali porezi,krešivanju penzij,dizanju plači, otvaranju novi radni misti,podizanju rodiljski naknad,pa čedu onda besplatno davat knjige za školu,gradit mostove,ceste,autopute,bazene,akvaparkove…,ča oče reč, ove dane če nan med i mliko,ma ča u potociman,u rikan čedu teč,a onda nakon oti pusti izborni obečanji najedan put čemo se probudit u postizbornoj realnosti i slušat čemo priče koje ja evo trideset i tri godine od kako glasan slušan,u kojima san devet puti na izbore bija i mislija da če bit bolje i svaki put san se privarija, ima bit da san uvik za krive glasa,nikad nije bilo onako ka ča je tribalo bit, ali eto, dolazidu mlađi, možda moja dica budedu pametnija od mene?