Pri dva dana smo Dragan Kovač i ja doli na plaži Sokolana odlučili učinit radnu akciju.
Kako je bila oseka moglo se učinit posla okolo dva metra prema pučini od obale dokle liti zna more bit, to je bila krajnja granica,dalje nismo mogli,jer bi more u čizme počelo ulazit,a bilo je posla čudo,brojili smo do dvajstipet karijoli stinj,dalje nas je štufalo,ko zna koliko ji je bilo,a večinu oti stinj je tribalo maškliniman vadit,jerbo je vanka virilo jednu desetak petnajst centimetri,a prema unutra je to znalo bit tridesetak do četrdesetak centimetri,a da ne ispadne sad kako se ja pušen da je to bija veliki posal,pogledajte na slike koliki su to kavali bili,a uz kavale je bilo i betona od obale koja se tote raspala i oti materijal se nije do kraja izvadija vanka,a ljudi bi liti ulazeči ovde u more iskričali gnjate,a ne mali broj puti bi i krvavi nog iz mora izašli,jer bi se naboli na oto oštri stinj ča se u moru nalazidu,a pa smo mi dva odlučili onoliko koliko nan je oseka dozvolila daleko ič,to očistili,a tamo dalje još uvik ima ostatak od otega materijala koje bi tribalo bageron izvadit,a i to bi se napokon tribalo uskoro dogodit,jerbo je Dragan dogovorija sa osobon iz jedne gradske službe koja bi to tribala učinit,pa je zva presjednika MO da pošalje dopis i sad samo triba čekat kad če se napokon i oti momenat dogodit,pa da nakon dugo,duuugo vrimena i oti dijal plaže bude sređen i kasnije posut sa,ne tamičen žala,več šleperiman,eto mi smo krenili,ka ča smo u predizbornoj kanpanji i obečali,a kako smo to ovde počeli,more se dogodit da čemo,ako to grad ne bude činit,mi i druge akcije po selu poduzimat…

Bilo je ovako:

Radovi na čiščenju:

Nakon čega to sad ovako izgleda:

A da vidimo malo kako je to prije bilo i sičan se koliko san slovi nabuba i textov učinija dokle se koliko toliko ovi dijal plaže nije uredija za da bi se ljudi tote mogli kupat,pa evo jedan text iz 2013 godine:

naslov

Kupanac na plaži Sokolana u gojzerican

Postavio:admin

Jema dobri nikoliko dan da me je par kupačic šta se volidu banjat na Sokolanu fermalo i pitalo da ča je reč da ništa ne pišen od oniman gromadan ča su u moru na plaži Sokolana di se lomidu noge kad triba u more uč? E, a iza toga su me opet fermali da ča je an, ima par dan da su mi rekli i da uopče nisan meka na portal? Trta a? Ajde k.ragu ti i trta čekan,a da ča čekan da mi rečedu u “komitetu” je li to mogu meknit?Ajte opet lipo na ono isto misto ka i malopri, čekan lipi momenat za to slikat kako triba pa da se sve lipo vidi. Aj pak kad čekaš momenat,uputile su se ča gingajuč glavan mumlajuči,a ni od tebe nima ništa.Aj pak.
I evo na ukaza se lipi momenat kad je sve to bilo lipo vanka i vidi se cili zid koji je bija dijal obale koja se srušila ima dobri 5-6 godin i odonda pa do dana današnjega stoji eto tot.

Evo priko ovoga šta vidite na slikan morate priskakat za poč se okupat.

Pokriveno moren to izgleda ovako:

Pa onda evo dva texta iz 2014 godine:

naslov

U gojzerice na plažu

Postavio:admin

Trevija me pri niki dan jedan malo stariji čovik pa me pita da bi li ja moga ništo napisat o onoj doli plaži na Sokolani ča je zid uletija u more tako da je njima starijiman puno teško ulazit i izlazit iz mora jerbo tribadu priskakat priko zida.A govorin ja njemu da jema plažu na Gojaču di nima vaki građevin u moru,a on če meni,e moj sinko navika je puno gadna stvar,ovo je plaža moga ditinjstva i evo ka ča vidiš moje starosti i nebi je minja za ništa na svitu. Dobija san ti ja bija stan u Splitu ma nisan izdura par miseci i vratija san se opet u selo i nastavija mi dalje pričat da sad ne duljin…,a ti sad ako si šta svatija od ovoga šta san ti reka i ako češ nama starijiman pomoč i napisat koju besidu o tome dobro,a ako nečeš opet dobro. Ma nije nikakvi problem za napisat,ali več san lani bija o tome pisa pa isto ka da nisan. Znan ja da si pisa (čita je) ma valja nike stvari i više puti ponavljat za da bi došlo do oni koji bi oto tribali čut jerbo znaš, oni su gori visoko pa prođe vrimena dokle do nji dođe.

Ovako to izgleda:

naslov

Sređije se plaža na Sokolani

Postavio:adminDatum:May 28, 2014 11:45 am

Vadi se oni zid i više nečedu tribat gojzerice za ulazit u more.

I na kraju,pozdrav svima oniman ča posprdno o meni zanji desetak godin govoridu,ma vidi ga šeta po selu ka redikul sa onin aparatičen obišenin priko ramena i ništo tamo bezveze piskara…