Napisa: pechina

Evo na , prošla je i ova noč od otvoreni muzeji.
Sad če koko reč ma vidi muktaroši, triba jin učinit besplatni dan o muzeji za da bi ji išli vidit.A ma nije to baš tako. Cilj ovega je da animira ljude za poč vidit našu baštinu
da nan se nebi dogodila pitanja ka ča san sinoč čuja u muzeju hrvaski arheološki spomenika
di se drži arhiv u kamenu,Starohrvatska riznica di je ovi jedan reka ma vidi koliki prostor
su oni učinili za ovo par stinj izložit.
A oto „par stinj“ je vridnije od cile one zgrade u kojima se nalazidu zajedno sa okolnon zemljon neka je na južnoj strani Marjana.

Nismo mi ka ča ji jema šta mislidu nastali devedeseti godin, nego smo narod sa punooo puno   velikon i bogaton tradicijon,a srozali smo se do te mire da nas za oto uopče nije briga.
Zanimljivo je da di se ko makli vanka ovi naši granic u tuđe zemlje, trčemo u njijove muzeje i to plačamo lipu cifru za vidit šta u njima jemadu, a u ne mali broj slučajev stoji se i po par uri u redu za da bi unutra mogli uč. Sičan se kad smo ja i ona moja bili u Pariz za uč u Luvr smo izgubili okolo dvi ipo ure vrimena i to su nan rekli da smo dobro prošli, a funcuti su
napravili tako da se ne vidi cili red nego su ga učinili da gre cik-cak pa kad dođeš na kantun od cika onda vidiš da još jema i cak.
I tako jema bar deset oti cikov cakov dokle ne baneš na muzejska vrata.

A kad smo doma onda zato nikad nimamo vrimena.
Pusti ičemo,a kad čemo ič? kad uvatimo vrimena, ovde je,nigdi neče pobignit.
E baš je zbog ovoga vidičemo neče pobignit potribna ova noč o muzeji.
Da ljudima približi unutrašnjost oti muzeji kraj koji svaki dan prolazimo ali
nikad nimamo vrimena za uč.
Nije to večer di čete vi uspit sve šta vas zanima vidit.
To je večer u kojoj če te među ostalin doznat i za one muzeje za koje  niste znali da uopče i postojidu jerbo otu noč, noč od otvoreni muzeji  kad se gradon kreče rijeka ljudi  samo se triba priključit i ostalo se sve samo događa.
To je večer koja je posebna, ima ništo u sebi šta se ričiman ne more opisat, jednostavno van je drago da ste baš u tome momentu tot di jeste.
To je veče šta ne trpi grintu i nestrpljivost, jerbo su gužve neopisive, puno eksponati  nečete
kako triba moč ni vidit, do određeni eksponati niti moč doč jerbo jema oni koji se ponašadu ka da su samo oni na svitu i da je ota noč samo za nji,ali zato i je učinjena vaka noč o muzeji
ono ča nisi sad uspija vidit dočeš lipo drugi put i na miru pogledat.

Ono gori na slici šta ga je jedan nazva pitar nalazi se u pomorskome muzeju, a izvađen je iz mora u našemu selu na Trsteniku.