Znan da če koko sad vidit datum i na ovo texta odma manit rukon,a sitit če se koko i kako san oba uređenju dila Sučuraške rive sa slikon projekta na isti datum ka i danas i 2017 godine isto tako pisa…

O uređenju Sučuraške rive se več generacijama govori,ovo ča sad jemamo nan je Franjo Josip u dotu ostavija,one gvozdene kolone za vezat brode doli na Mulu bi nan mogle puno toga reč i kad se jednoga dana ova naša riva bude stvarno,a ne imaginarno uređivat,tribalo bi ji na počasno misto meknit…
Sam Bog zna koliko je od sredine devedeseti na ovamo razni verzij projekat,idejni,a i oni drugi, za ovu našu Rivu učinjeno,pa se svaki put ništo nanovo nadožuntavalo,oduzimalo,minjalo…
Evo najnovije za ovi dijal centralne Rive da če se baš tote činit “lučica” sa oko niki,kako se sad spominje,ništo više od 400 vezov,a zanimljivo je kako i od prije isto tako postoji ti niki,kako čemo ga nazvat nacrt,projekat,idejni… ili kako li se več to zove,di je isto tako nasrid Rive bila nacrtana lučica,pa se nakon toga od mista za vezat tote brode odustalo,a prije dvi godine na Mjesni Odbor nan je doša niki novi projekat,kojega,iako nismo vidili,o njemu raspravljali,a bila je rič o lučici,luci ili kako čemo je več nazvat od četiristo i četrdeset vezov koja je bila predviđena tamo nigdi od tunbina,pa prema Mulu,neznan dokle točno bi došla,jerbo ka ča san več gori napisa,na karti nimo ništa vidili,e i sad najedan put je opet osvanila ona verzija od prije,samo naravno,izminjena, di se ota lučica ili šta li je več,nalazi opet na središnjemu dilu Rive,koja bi se pružala od mula put Sokolane,a dokle točno bi se protizala,je nepoznanica,jerbo je bilo napisano do Rubinjonove ulice,a to je do Novega puta,dokle ono ča se vidi na slici od otega nazovimo projekta ča ču je evo doli meknit,to puno dalje…

Ovo doli je text iz 2017 godine kojega san učinija na isti datum ka i ovega 😀

Jema bit da se napokon kreče i sa konpletnin uređenjen naše rive,pa bi se u sklopu toga (ka ča vidite na slici) uredila i lučica za kaiče,a uz novi lukobran i za jahtice, ča nan liti znadu zalutat.
E sad se postavlja pitanje, da okle na jedan put za ovo učinit pinez? Izbori?
Ne! Da če to jedan naš Sučuranin ča je cili život bija vanka i nima kome ostavit ono ča je steka, učinit ovo ka poklon za svoje selo,a zauzvrat ne traži ništa,samo jednu kamenu ploču na kojoj če pisat njegovo ime i prezime i da je on to financira.E.