Lucifer,je ime ove nazovimo nepogode ča nas je jema par daan strefila i od grinte, zbog vručine, su nan svi okolo za sve krivi,a di neče,jerbo kad vanjska tenperatura priđe granicu ljudske unutrašnje tenperature,onda jednostavno više ne moreš normalno funkcionirat,tako da tenperatura od 42 stupnja i ništo,največa ikad izmirena ovde u nas i te kako utječe na ljudski organizam,a kako je direktno na zvizdanu pokažije i termometar kojega san meka na sunce i koji se popeja do kraja skale od 50 stupnjev, koliko najviše more pokazivat. Jedina preokupacija u ovoj nevolji ča nas je strefila ti je ča češ sa sebon učinit za da bi se rasfriška,toliko je vruče da se ni u moru ne moreš razladit,jerbo mu je tenperatura 27 stupnjev pa svi trčedu ispod tušev,kroza grad se, neka postojidu tabele opomene,gre polugolo,a funtane sa vodon su najposječenija mista,šeta se pokriveni lunbrelan, traži se spas u ladu,evo meni pas jema par daan leži ispod limuna di mu je lipo mokro…
A koliko če još ovo? oni ča prognoziradu govoridu da neka izdržimo još danas,jerbo iza ovoga krečedu neverini,(oče opet led padat,ča nije suša uništila satrat če krupa?) to če gori u unutrašnjosti,dokle ovde u nas zovedu niku buru,padaline niko ne spominje.