Evo ji opet Filomena, Domina,Mandina,Kate i Marijeta pet lajoni koje se svaku nedilju nađedu na kafi i sve živo izprivižitajedu.Več počeli sa velikon polemikon okolo biranja novoga pape nima šta neznadu, pa čemo malo prislušnit šta to jemadu pametnoga za reč.Jeste li vidili, jučera su na Vatikan mekli fumar kroza kojega če nan stizat vijest jesu li se dogovorili oko novoga pape. Asti Kate,a kako to kroza fumar če nan stizat vijest? a jesu li to onda ka dimni signali? Ajde Filomena kvragu ti i dimni signali, jeli se ti to rugaš,a?
A ne rugan se nego mi nije jasno da čedu u ovo vrime od puste internetike i informatizacije poslat dimon obavijest jesu li izabrali papu i još me zanima,a šta ako se slučajno dogodi da falidu i zamisto kemikalije od crnoga dima meknedu onu za bili dim,a papa još nije izabran?Kako če nan onda reč da su falili? A slika sa bilin dimon je priko sateliti več obašla cili svit. Aaa, ne more se to tebi moja Filomena objasnit, to je tako jenu miljun godin i sad bi bilo čudno kad bi se oti dim ukinija.

A šta je reč Kate? očeš reč da san ja sad nazadna,a dim napredan? Ajme nji dvi ma vidi oko čega se karadu fumara i dima. Nego jeli znate da su več gotove i monture za papu? Monture? Ajde Marijeta vidi šta se ti puno razumiš, biradu jednoga,a ne nji par.Ma je, ali ne znadu koji če pobijedit, ne reče se pobijedit nego koga čedu izabrat, ajde Kate pusti me na miru da rečen šta jeman i više me ne ispravljaj.Napravili su monture u tri veličine tako da moredu za svakoga odgovarat,ali su jin postole problem ko če pogodit prave,lako je za brojeve neka je raspon u najviše deset broji,ali ovemu je širija noga, onemu uža, ovemu deblja, onemu tanja i nije lako tot pogodit.

Ajme meni Marijeta šta si ti smišna,a neka obuje one komodnije bitno je da dođe do balkona da ga narod vidi, ka da če mu ko u postole gledat. Neče vidit, a novinari viridu sa svi stran,jema ji i po granan i odmar čedu vidit ako ništo nije kako triba bit. Ma čekaj meni ništo nije jasno? Oli ne more ostat u one svoje postole? Ajme Mandina opet tebe,a ča bi ti minjala tradiciju? A je li? kad su postole u pitanju onda se triba držat tradicije,a to šta nama popi svako malo minjadu našu to nema veze? I zna li ko zašto pape uvik jemadu crvene postole (osin pape Ivana Pavla II, on je jema smeđe)? Šta je, šta ste blenile u mene? Ka da ču van ja reč,zato i pitan jer ne znan?A ne znan ni ja,ni ja,a ni ja,a bome moran i ja priznat da neznan. Ajme mučite nemojte da nas koko čuje da ne znamo odma če nan past rejting.

A ne more nan više past od onoga tvoga Milanoviča šta je ka frajerski iša sa transportera skočit pa se je umalo ubija. A lipo je pada isto ka ča nan i standard pada,ali zato jema uza sebe ministra koji od jednoga zna učinit dvajstipet.
Aj Kate budi malo jasnija ma ča od jednoga dvajstipet?A ništa Filomena kupija je zemlju ups, pardonček nije on nego mu bliska osoba za miljun kun i onda je ota zemlja doživila renesansu i sad vridi pišljivi 25 milijuni kun. Je, sad ste mu to izvukli deset godin kasnije,a u vrime Sanadera su se čuda događala,a da niko za ništa nije zna, svi su dizali ruke za,ali nisu znali zašto?

Ostali smo bez dvi firme ča se bavidu likarijan i nafton, a to su dvi grane koje su u samome svjeskome vrju po zaradi. I niko za ništa nije zna,ali se zato zna da je Sanader to učinija.A Vlada je izglasala????
Jesi li Filomena odma pribacila,aj pak, a vidiš oni tvoj idij… ajme dosta više vas dvi odnija vrag politiku uvik se zbog nji karate,a oni se između sebe dogovaradu.Dobro i ti Marijeta govoriš. Ma šta dobro govori Filomena,kad tebi odgovara onda dobro govori i nisan još gotova,a reci ti meni Filomena ko je uveja da se na svaku uberenu šparogu u Hrvaskin šuman triba platit po 50 lip. Udri po narodu sa svi stran. Najpri jin smanji plače, pa onda kad mu priroda da da more štako ubrat za izist,e onda ga sačekaj odizad kantuna i opizdi ga toljagon po glavi.

A ča bi ti Kate mukte jila? Prošli su ti dani Kate moja kad se pivalo družilo i veselilo na sve kantune, a danas? Priča mi ovi jedan poznanik kako ga je sram koga poznatoga vidit u selo jerbo bi bija red da sededu u kafič za čako popit,a izbjegaje se,samo se na brzinu mimoiđe jedan kraj drugoga,oli malo stane prozbori dvi tri rečenice i onda, ajme meni priša mi je moran poč vamo ili tamo ili čeka me žena da donesen manistru…

Kako nima Mukte spize Filomena moja,a oli nisi jučera vidila kako je novi vlasnik o Spliskoga škvera učinija veselicu šta je Split dosad nije vidija. Bilo je okolo sto janjac, i vola je ispeka,a fažola je bilo za po Splita. Je Mandina vidila san ma to je bilo u subotu,a ti isti ča jin je da jist od ponediji če otima šta ji je najija počet dilit radne knjižice.

A jeli van nije valjalo ono onda,evo van na pa sad držite. Prije bi kad bi se čovik u firmu zaposlija bija miran do penzije i dicu bi još kad bi završili škole uspija zaposlit. A sad? Zamisto da dica pomažedu roditeljiman sa malin penzijan roditelji od svoji mižerjasti penzij moradu davat dici koja kopadu po kontejneriman i skupljadu boce i limenke da bi mogli priživit jerbo se nimadu di zaposlit,ali zato nan kuridu antidepresivi. Ajme eee opet se vrtimo u krug. Je Domina moja,a očito nan je tako suđeno. I da završin, prije si vriču andoli na ricetu moga vazest,a sad likariju za priživit ako nimaš pinez za platit je onda če te vrag odnit. Filomena ma to smo čuli več milijun puti. Eto Van sad miljun i prvi.

A jeste li čuli ,kad smo več kod likarij za onu malu od osamnajst godin ča je dežurna ginekologica nije tila primit kad joj je cura objasnila razlog zbog kojega je došla?Ka da je maloj bilo lako doč i reč kako je tokon sexa puka prezervativ i da se sad boji da nebi ostala u drugome stanju i pitala je da jeli joj more dat onu tabletu ča se zove dan posli za da bude sigurna, a ova jon je ginekologica kad je napokon primila odbila dat otu tabletu. A je Domina moja, to je isto ka i ona apotekarka ča radi u Dugome Ratu u apoteku koja jednoj curi koja je došla sa riceton nije tila dat kontracepcijske tablete jerbo jon se to kosi sa viron??

Asti Mandina,a to onda znači da ove žene šta radidu nedijon moredu reč šefu da nečedu oti dan doč na posal jerbo jin vira ne dozvoljava. Je, bravo Domina moreš mu reč i više ne tribaš na posal dolazit. A kako to onda ova bi dobila otkaz,a ove dvi su i dalje nastavile radit,a ja to ne razumin?? A lipo Domina. A onda znači da npr. likar usrid operacije more itnit instrumente i reč, a šta ču ja ovoga operirat kad je Bog naumija da se vako razboli i očito tija da umre,a ja bi ga sad triba spasit i ič protiv Božje volje?? Neču jer mi se to kosi sa viron. Ili npr ima i oni koji nikako ne želidu primit tuđu krv iako mu o tome ovisi život jer mu vira to brani. I sad zamisli jednoga takoga i da je likar i opet kirurg, pacijent mu je na stolu, krvari zbog operacije,a likar neče da ga spoji na transfuziju jer mu se to kosi sa viron?

A ta u apoteci kad se opridilila za u školu odit znala je da če među ostalima mušterijan morat davat i tablete protiv trudnoče i spirale i prezervative pa šta je onda išla u farmaciju? Šta nijeu školu za u švore išla? Ka da gledan Brešanovu Svečenikovu dicu. Triba ovo odma po kratkome postupku sredit pa da drugome ne pada na pamet,a zamisli kad bi svak prema vlastitomen nahođenju radija ono šta on misli da je ispravno? Ajme anarhije. Zato to triba odma u startu zaustavit da se ne pitamo kasnije,a kako nan se ovo dogodilo? I da ne bude ono, Eto tako!