A ča moreš pametno još napisat o oniman događajiman ča se periodično ponavljadu svake godine?

Ništa..

Je nan ova zapadnjačka “kultura” od kraja osandeseti na ovamo prosvitljenje učinila. Ma zamisli ti blagodati,do onda smo samo sa onoliko pinez koliko smo u žepu jemali, mogli raspolagat,a onda smo se najedan put priporodili i uz pomoč ono bokun plastične kartice moga koliko si ko tija bez pinez kupovat,tribalo je dosta vrimena dokle su ljudi svatili da ono šta su kupili tribadu i platit,a jema ji šta i dan danas mislidu da če to koko drugi zamisto nji učinit.

Sičan se tamo ’99-te godine kad san kraj kuče Inglešku travu posija pa mi je ovi jedan reka da san lud. A ča je sad? Da ča je sad? Kako se ta trava zove? Ingleška. A da jeli ja znan, pita on mene, kakvo je vrime u Ingleškoj? A ča ja znan,nisan danas prognozu gleda. Odnija ti vrag prognozu,opčenito ono kakva su jin lita i to? A ja mu govorin onu njijovu ča glasi,da ako ne vidiš Big Ben onda pada kiša,a ako ga slučajno vidiš onda znači da če kiša brzo počet. E i govori on meni i ti si sad posadija tu Inglešku travu  ovde u Dalmaciju di liti na zvizdanu i po pedeset stupnjev zna bit.

Ili ono sa luminacijan za vrime Božiča i Nove godine, od kuč i okučnic činimo luna parkove. A kad je lipo za vidit,a je lipo je,a ko se toga sitija,a opet oni isti sa početka priče.

A Valentinovo? Ma zamisli imaš jedan dan u godini za pokazat se kako nikoga voliš,a to naravno ne ide bez poklona i pustite one priče kako nije bitan kakvi je poklon več da je od srca.Koja glupa izreka, to ni u male dice više ne prolazi.Ima toga još, ali sad nečemo.

Pa je tako pridučera u modernomen svitu, bija Dan,ustvari Noč vištic  ili kako to oni na zapadu rečedu Halloween, koji najluđu zabavu jema u Los Enđelesu di se na ulican skupi okolo pola milijuna maškaranoga svita,a ni smo ni mi za bacit i u nas se po razniman kluboviman  organiziradu  maskirane zabave na kojima, ko je od sebe učinija luđega zombija, je veča faca.
A osin Halloweena u nas jema par godin od strane crkve bude upriličena Noč otvoreni crkava, Holliveen. Inicijativa je krenila iz Vatikana ka bojkot za Noč vištic.A naravno,ka po običaju u nas jema svita koji očedu na dvi tri,a i više katridi sidit.

A sad mene interesira di bi po ovomen mogli smistit one šta su najpri čedno obučeni išli na Noč otvoreni crkav,a posli toga ka strašila  na proslavu noči od vištic,šta oče reč iskočili iz Holliveena i uskočili u Halloveen?