Kad san prvi put ovo pročita mislija san da se radi o nikomen restoranu,hotelu,kafiču…

A več tamo drugi treči put mi je bilo malo čudno ča to toliko spominjedu,ni prvi ni zanji da ga je ovršilo,a kad san se malo bolje zainteresira,svatija san to kako je Cesare ustvari ime jednoga diteta.

A inače kad čujen rič ovrha odma mi se diže ovo kose ča još iman na glavi i odma mi rolete na oči padnedu,a još kad san čuja da če se ota ovrha izvršit nad ljudskin bičen,u ovomen slučaju ditetu neču niti opisivat ča san sve izbeštima.

Pa mi sad pada napamet ono ča san več jedan put bija pisa,pa su mi se smijali,a pisa san o tomen da čemo bit ka predmeti koji na sebi jemadu inventarne brojeve, imeniman nas više niko neče ni zvat,bičemo jedan najobičniji broj, kad ideš izvadit krv moraš vazet broj,ideš u banku,opet moraš vazest broj,u koji telekomunikacijski centar,opet broj,u apoteku te traži po broju socijalnoga-dopunskoga,na drugo misto po broju osobne ili jmbg-a,oiba…

Bilo bi najbolje da nan svakomen na ruku utisnedu bar kod koji če nan bit identifikacijska kartica za sve ovo gori ča san, ka i ono ča san zaboravija napisat,pa če ti lipo tamo di dođeš,vazest skener učinit priko koda biip i sve če o tebi znat,an zaboravija san i krvnu grupu bi još tote uvalija.

Ka prvo ajde mo mi vidit po definiciji,ča je to ovrha?

A ovršni postupak je postupak po kojemu sudovi i javni bilježnici provodidu prisilno ostvarenje novčani i ne novčani tražbina na temelju ovršnih i vjerodostojnih isprava.

A svrha ovršnoga postupka je namirenje ovrhovoditeljeve tražbine koju ovi ka vjerovnik ima prema ovršeniku ka svojem dužniku.

Dobro je,sad šta je tu je,da nebi valjalo razmislit o kojemu drugačijemu terminu kad su ljudi u pitanju, bi.

I skupilo se jučera na Pujanke isprid ulaza od zgrade u kojoj mali kojega če ovršit stoji,krcato svita,bilo je tote i stari i mladi i oni u trlišu i oni sa vikleriman u kosi i bajkeri i branitelji i Torcida i oni ča mislidu livo i oni ča mislidu desno i oni ča šaljedu  i jedne i druge kvragu,bilo je tote ljudi sa estrade,političari … čula se  i molitva,pivala se Lijepa naša,Zovi samo zovi…

Svi su došli za spriječit da se dite ne ovrši i da ga otac Talijanac nebi odveja sa sebon u Italiju.

Napeta je to bila situacija,koja je svakoga časa mogla eksplodirat,čekalo se kad če se „ovrha“- mali kojega tribadu odvest pojavit na vratiman.

A onda je jedna žena sa pirijon u ruci objavila vijest da se do daljnjega Cezar neče ovršit,ali svit više nikomen ništa ne viruje,pa je bilo govori ti govori,to se čeka da mi gremo ča,pa čedu onda oni to na brzinu učinit.A kad je stvarno bilo jasno da do ovrhe neče doč prolomija se pljesak oduševljenja,opet zapivala Lijepa naša,ka i Zovi samo zovi,ali opet sve ništo ljudi gingadu glavan,čudno jin je di je došlo do vakoga preokreta.

A meni taman naletija ovi jedan,ča je ča se tiče vaki stvari pametniji od mene,pa ga ja pitan,a jeli ča ti misliš o ovomen svemu,zašto se odustalo od ove ovrhe?

A on če meni, aj pogledaj tamo put zgrade,ča vidiš? A vidin puno svita. Ok,za tebe je to puno svita,za mene je po procjeni nigdi između iljade ipo i dvi iljade ljudi. I ča još vidiš? A ča vidin,a nosidu natpise.

Ma pusti natpise,ča vidiš ko  je sve tote,a jema mišano i veliki i mali i sridnji.

Vidin ja da ti to mene ka malo zajebaješ. A nije, ča ja znan ča vidin,da znan onda nebi tebe pita da mi objasniš,jerbo je meni ovde puno toga čudno,a i odavna san pa znan da ništa nije tako jednostavno ka ča se to pari da je.

Dobro,onda ču ti ja sad onako laički objasnit,vidiš li ove puste kamere,mikrofone,e, znači u svakomen momentu,po potribi,sa lica mista se  uključijedu kamere i slika je za par sekundi na televizijan,radijo isto tako,a ne triba zanemarit i mobitele sa koji slika ide direktno na fejs, koju če u par minuti vidit ko zna koliko iljad drugi ljudi,e, i sad zamisli da je krenila ovrha,ljudi koji su se skupili,očedu tu ovrhu zaustavit,u ovoj masi svita,po mojoj procjeni ima oko dvadesetak posto dice i zamisli sad da se u toj gužvi dogodi da koje dite padne,najblaže ča mogu reč,udre kolinon u asvalt i počne mu teč krv,ovi ča su do diteta počmedu vikat ča se dogodilo i eto ti situacije ča je ni Hičkok nebi moga predvidit,ovamo se spašaje dite od ovrhe,a ovamo,drugo dite koje je zbog toga  došlo krvari i sad se vratimo na televizijske kamere koje čedu to odma direktno poslat u program,radio postaje koje če u eteru to objavit,slika koju če na fejsu vidit par iljad ljudi i eto ti situacije koja ni u najcrnijemu scenariju nikomen nebi pala na pamet,jer, možda bi s ovima ovde koji smo, izašli nikako na kraj,ali niko ne more procijenit koliko bi posli gorispomenute situacije sa ozlijeđenin diteton nahrlilo bisnoga svita i ča bi se ovde sve događalo.

Ok,kako san te razumija ovo je onda napravljeno zbog sigurnosne procjene?

Ne mora bit,ali,jesi li me pita,pa san ti evo ja reka svoje mišljenje.

A čekaj malo onda po tomen ispada da ako se ova zavrzlama ne sredi pravnin puten i opet bude u pitanju ovrha ispada da je nikako nečedu moč učinit?

A oče,oče. A kako? A lipo. A je li se sičaš prve gej parade ča je bila u Splitu? Da je li se sičan.

A je li se sičaš druge gej parade ča je bila u Splitu? E,a ča mi očeš reč?

A oču ti reč to da se na drugoj gej paradi nikako nije moglo dogodit ono ka ča je bilo na prvoj,jerbo je sigurnosna ograda koja je dilila sudionike u paradi i oni koji su ji gledali bila udaljena i tridesetak metri,tako da sa situacijon moreš vrlo komodno vladat,ali eto,nadajmo se, ka ča si ti malo pri reka da če se pravno sve riješit i da do ovakvoga scenarija neče doč.

A sve me straj,evo dokle ovo pišen malo san iša čeprkat šta ima novoga pa san doša do texta u kojemu otac od maloga govori kako je jučera mora stat isprid tri ipo iljade bijesnih Hrvata koji su ga ismijavali i bili protiv njega???? A di san onda to ja jučera bija? Moraču poč u likara vidit ča mi  je,kako  san več moga zaboravit da se ovo ča je oti napisa dogodilo?

I još je ništo napisa ča mi uopče nije drago i zbog čega bi drugi put,ako dođe do ovrhe moglo sa prosvjedon ispast sasvin drugačije nego ča je bilo ovi put,jerbo napisat da je sad na njiman red  (talijancima)da pokažedu da su borbeniji od četiri ipo milijuna stanovnika Hrvatske i nadoda, kako je nji šezdeset milijuni i da nečedu podvit rep i Cesarea čedu dovest kuči.