.Je nan ova zapadnjačka kultura od kraja osandeseti na ovamo prosvitljenje učinila. Ma zamisli ti blagodati,do onda smo samo sa onoliko pinez koliko smo u žepu jemali mogli raspolagat,a onda smo se najedan put priporodili i uz pomoč ono bokun plastične kartice moreš kupovat koliko ko očeš,a da ne tribaš pineze iz žepa vadit i tribalo je dosta vrimena dokle su ljudi svatili da ono šta su kupili tribadu i platit,a jema ji šta i dan danas mislidu da če to koko drugi zamisto nji učinit.
Gledali smo na filmoviman kako ljudi ostajedu bez oti kartic, kako jin u dučaniman rižedu nožican ,priko noči ostajedu bez imovine i spavadu u parkoviman pokriveni novinan,skupljadu limenu istaklenu anbalažu,a sad to sve jemamo u stvarnosti,kad van dadu otkaz dobijete ga sms porukon,niti vas u oči ne pogledadu,a samo smo tili malo demokracije i velike plače ka ča oni na zapadu jemadu

Pa je onda najedan put došla moda pa smo ovde u Dalmaciju di liti na zvizdanu bude i plus pedeset i oho ho stupnjev počeli sadit Inglešku travu

Ili ono sa luminacijan za vrime Božiča i Nove godine od kuč i okučnic činimo luna parkove. A kad je lipo za vidit,a je lipo je,a ko se toga sitija,a opet oni isti sa početka priče.
A Valentinovo? Ma zamisli imaš jedan dan u godini za pokazat se kako nikoga voliš,a to naravno ne ide bez poklona i pustite one priče kako nije bitan kakvi je poklon več da je od srca.Koja glupa izreka, to ni u male dice više ne igra.

Pa su nan onda uvalili i noč od vištic ili kako to oni na zapadu rečedu Halloween koji je najluđu zabavu jema u Los Enđelesu di se na ulican zna skupit okolo pola milijuna maškaranoga svita,a i u nas po razniman klubovima budu maskirane zabave na kojima ko je od sebe učinija luđega zombija bude veča faca.

Pa nan to sve nije bilo dosta,nego nan je uvalilo i crni petak,black Friday,di npr. u jamerikan i po nikoliko dan čekadu isprid dučani u kojiman su ništo zacrtali za kupit i ča se ovi dan spušta i za devedeset posto,pa puno nji u šatoriman zna spavat za da ujutro u raniman uran kad dučani otvaradu budedu među prviman,a to kad otvoridu vrata od dučana bude opči kaos,svi na jarpu ulječedu, rušidu sve prid sobon,a za doč do stvari koju mislidu kupit se puno puti i potučedu,a u potizanju znadu oto i raskidatili razbit

Ali naravno ka ča kod nas nisu došle velike plače isto tako izostali su i veliki popusti,tako da se u nas i dalje nastavlja sve po staromen,onako ka ča je i bilo pa tako u odnosu na nji koji imadu velike plače i velike popuste,u nas smo mi to preveli na male plače i male popuste,pa se ote kupnje odvijadu ka u apoteci,nima divljanja,beštimanja,guranja,tuče,nismo mi divljaci ka oni…mi to sve lipo u fino činimo
I sad se dokle ovo pišen ne mogu ne zapitat,a ča nan je sljedeče ča čemo od zapada priuzest?
Možda čemo počet činit paradu za svetoga Patrika?