A Je nan više bilo navr glav selo pripucavanje politike o ustašaman i partizaniman i di si bija 91′,a sad jedva čekamo da se u Saboru opet okolo toga karadu.
U svakoj nevolji kad te snađe vidiš kakvi je ko,a u ovoj se nismo baš lipo iskazali,uzeču za primjer kupovinu u dučaniman di su se pojedinci ponašali ka da su samo oni i njiovi bližnji bitni.

Sičan se tamo u doba mraka kad se u redoviman stajalo za kupit cukar,ulje,kafu,prašak za prat robu…,
pa su oni ča su jemali vrimena po cili dan stajali u filaman i nakupovali zalihe za nikoliko godin,pa se ovemu jednomen starijemu bračnomen paru dogodilo da su se,dokle su u otiman svojiman magaziniman doma spavali, zamalo udušili,a razlog je bija prašak za prat robu kojega su toliko nakupovali da su se zatrovali od njegovoga mirisa i završili u bolnici.
Neznan jeste li uspili vidit jedan videjo koji je ka i puno nji u ovo doba o Korone ugleda svitlo dana,a na kojemu morete vidit škatulu punu oguljeni mandarini koju su stavili isprid dvadesetak majmuni i bilo je vrlo zanimljivo za vidit kako če se ponašat,a ponašali su se upravo suprotno od ljudske vrste,svaki majmun je uzeja po dvi naranče,u svaku ruku po jednu,nije ji stivava,pa kako bi uzeja,maka bi se sa strane da i oni drugi moredu do nji doč.Pogledajte ako niste,vrlo poučno.

Gledajuči ovo sve ča se samo u dučaniman događalo nameče se logično pitanje,a ča bi bilo da nismo nacija od osandeset i pet posto deklarirani krščani?
Pokazali smo se puno lipo,vidi se da nan je stalo do drugi,je,je,daj ti meni,ja san sad na redu,a ko je… bip ove ča su u redu iza mene,pa je tako bilo oni ča su uzimali i po pedeset kili mesa,jedna osoba je kupila okolo šest iljad kesic kvasa,a to bi da svaki dan troši po jednu kesu bilo za jednu šesnajst godin i četiri miseca,ne računajuč pristupne godine,a dobro,recimo da ona stavlja po dvi kese i to je onda za samo osan godin,pa kako nas bonbardiradu vijestiman sa svi stran ove naše nesritne Balote onda smo mogli vidit jednu bakicu koja jedva stoji na nogan i nije se mogla sa orngutaniman tuč i gurat,došla je u dučan nakon stanpeda i stala jadna isprid prazni polic i plakala jer nije imala ništa za kupit ili jedna mama koja je plakala isprid prazni polic od pelen.
Dobro,reklo nan je kako više neče bit potopi i neče nas činit stupoviman o soli,zato ako imalo virujemo onda valjda razumimo da smo za sve ono ča nan se događa,sami krivi,a kušnja je ta koja če pokazat je li i koliko je „Oni“ bija u pravu,a bija je,samo mi mislimo da nije i nameče se logično pitanje,čemu se onda u nekoj bliskoj ili dalekoj budučnosti zbog ovega kakvi smo,moremo nadat,možda da nas opizdi tamo niki meteorit i ovo naše Balote odrebati daleko tamo u niku crnu rupu,ali,ma nemojte Vi mene ozbiljno svatit,ovo ja nako… ma On se vara, nismo mi takvi ka ča misli da jesmo.

Svitlu točku u ovemu svemu,dokle smo se uopče snašli ¸šta nan se događa pokazali su oni,kako ji ovi sa početka priče, razne „NOE“ nazivadu divljaciman,e a oto divljaci bi tribali bit pripadnici Torcide koji su se do sad u svakoj nevolji pokazali,pa su se sad ti isti, kako ji ovi pitomi iz dučani nazivadu, divljaci,stavili odma na raspolaganje i nikidan su bolnicu na Križinaman selili i pripremili za prihvat bolesni,a onda pošto nevolja ne ide sama nego uza sebe uvik jema i društvo uz ovi nesritni virus Zagreb i okolicu je pogodija još i potres,pa su se gori prvi na terenu pokazali,opet, ne oni pitomi iz dučani,nego kako ji oti nazivadu,divljaci,ovi put Bed Blu Boysi koji su hitno ispraznili Petrovu bolnicu u kojima se nalazidu rodilje i dica nedonoščad u inkubatoriman koje su, kako volidu reč oni pitomi iz dučani,divljaci, pažljivo spašavali iz ruševin i pribacivali na sigurno,a kasnije i jedni i drugi i Torcida i Bed Blu Boysi,oni isti koji su na zanjoj utakmici na Poljudu kad su igrali Ajduk i Dinamo, jedni na druge toliko uvrid poslali da se čovik mora zapitat okle toliko mržnje jedni prema drugiman,a onda oti isti dan kad se u Zagrebu potres dogodija pripadnici Torcide i BBB zajedno dižedu šatorsko naselje za unesričene,a reče koko i BBBoysi su došli u Split pomoč Torcidi kad je bija oni veliki požar,je, i Torcida je odila gori kad su bile poplave,ali ova sad situacija je prilično bebava,pošto je promet između gradov ukinut,pripadnici Torcide Zagreb su bili ti koji su se izložili,zašto izložili,a zato jer oni ipak gori stojidu i nije pametno da se razotkrijedu koji su,ali pomoč ljudiman u nevolji je jača od bilo čega i bilo bi dobro da se puno oni ča o sebi mislidu sve u superlativu i ove momke nazivadu divljaciman,na nji ugledadu. Sad če koko reč ma vidi ovega pametnjakoviča sad od nji oče učinit heroje,ma dobro ste rekli,a kako to u nas več ide u ovemu svemu pravi heroji su pustošili police u dučaniman i kreli jedni drugiman spizu iz košar za napunit svoje „Noine Arke“

Govoridu da nakon svake katastrofe postanemo pametniji i da nan je to škola kako bi se tribali u budučnosti ponašat,ma me sve straj,jerbo u nas vlada ona,mavanje rukon,pusti lako čemo i uvik sve po partizansku rješajemo,a te partizanske metode činidu upravo oni ča drvlje i kamenje po njiman iskričedu?

A to jesmo li došli pameti vidiče se nakon završetka ovega svega ča smo i ča čemo još proživit zbog ovega nesritnjega virusa i nadan se da se ovo neče tako lako zaboravit i da če se poticat proizvodnja svega onega ča nan je u ovoj krizi pofalilo i da če se dovest u red sve ono ča je ova kriza pokazala da u redu nije,a koliko smo stvarno ovo okolo ugroze ozbiljno svatili pokazat če se na primjeru oče li se npr. saga okolo Imunološkoga zavoda napokon završit i on ka strateška grana stat na zdrave noge,jerbo smo u ovoj krizi vidili kako je svaka zemlja individua i da gleda kako če za sebe ostavit i svoje potribe namirit i da vridiš onoliko koliko si samostalan,a mi smo dobar dijal svega korisnoga rastočili i ovisimo o uvozu koječega iz vanka,pa čak i onega najjednostvnijega kvasa nimamo,iznenadila me činjenica da i njega iz vanka uvozimo,a o zaštitniman maskan i svemu ostalome ča smo olako svačali nečemo ni govorit,toliko o suverenitetu.

Zanimljivo je da kad nan dignedu cijene od telefonije,struje,vode…,onda nas znadu uspoređivat sa oniman iz vanka,a zašto se naše vlade u poljoprivredi koju smo do temelja uništili nebi uspoređivale sa onin šta se radi u Austriji,evo npr.kako oni štitidu svoje vočare,ko u Austriju uveze jabuku koju če prodavat po nižoj cijeni i na oti način ugrozi prodaju domače jabuke, ne more se više javljat na nikakve natječaje za dobivanje poticajni sredstav,a eno u nas su se nikidan pojavile jagode iz Italije,a naše Vrgoračke neka gnjijedu,a kako u vočarstvu,tako je i u stočarstvu,poljoprivredi…,sičamo se, bilo je to, ne tako davno, kad se cila ondašnja yuga sa dvadeset milijuni stanovnikov snabdjevala salaton iz Jadrovi plastenici,a sad nima ča ne uvozimo i bogati selak koje ga smo jemali uništen je,isto ka ča se to i Jadru dogodilo.

A koliko smo svatili ozbiljnost situacije koja nan je pokazala kako smo mali,majušni i da nas u tren oka vrag more odnit, pokazat če se na primjerima ove i sljedečih vlada,pa če bit zanimljivo vidit očemo li i u budučnosti olako puštat ovi naš mladi pametni svit da gre vanka gradit tuđe zemlje,a mi i dalje zbog toga propadat, bit če zanimljivo vidit šta če bit sa ekipon sa Spliskoga FESB-a koja je došla na ideju da usrid ove krize na 3-DE printeriman počme činit zaštitne vizire za naše likare, koji ji moredu spasit od virusa,oče li i dalje pri zapošljavanju bitno bit da si stranački poslušnik, jer samo oni moredu na lipa mista radit,je,je,oni su „krvarili“ za stranku,rečete sada ma vidi ovege mudrijaša,kako krvarili,a lipo i mene je iznenadila ta izjava,dokle nisan čuja iz just jednoga takvoga „ratnika“ koji je objašnjava kako je on za stranku lipija plakate,radija za izbore,na društveniman mrižan o stranci pisa sve u superlativiman,činija lajkove… drugiman ričiman „krvarija“za stranku koja mu se mora odužit sa lipin radnin miston,a za ove druge jema posla na lopati…
Oče li nan pestošezdeset iljad propusnic ča nan u ovoj krizi tribadu za odit od točke A do točke BE napokon otvorit oči pa da ovu nelogičnost okolo rascjepkane lokalne uprave, razni gradov,opčin… napokon dovedemo u red?

A neznan koliko smo mi od svega ovega šta nas je snašlo,naučili,mislin da nismo puno,a možda se ja i varan,ali ovo šta vidin nije mi uopče drago,ljudi sad ove ča su se zarazili sa viruson,stigmatiziradu,etiketiradu,natječedu se ko če dalje pljunit,ka da su oni sami krivi ča jin se to dogodilo,a kako nan stručnjaci govoridu ko zna ko sve od nas nosi oto virusa,a da i nezna,koliko upravo takvi ča bi se “itali stinjan” isto tako jema oto virusa i opet ču ponovit,a ča bi bilo da nas nima osandeset i pet posto krščani,a pa bi ja u Velikomen tjednu ote podsjetija da neka malo uzmedu Bibliju u ruke i vididu kako se Isus ophodija sa gubavciman. Inače,gubavci su u ono vrime isto tako bili smišteni na odvojeniman prostoriman-karantenama,niko jin se nije smija približit na manje od dva metra,a kad bi ji ko vidija onda bi se u njega itali stinjan,a pa kad to usporedin sa oviman ča su bučni u osuđivanju oni ča su se od Korona virusa zarazili i još bi tili da se objavidu imena zaraženi,onda se moran zapitat šta je sljedeče,počet čemo bižat od onkološki bolesnika,jerbo kako se među narodom govori kako se i rak poput zaraze širi,pa bolje bit na sigurno,eto njega tamo,a mene vamo.

I onda se pitamo zašto nan se sve ovo događa,a upravo zato šta je duševna guba uzela puno velikoga maha.
Zdravi Vi meni,veseli i „negativni“ bili i ne obadajte me ča ja ovo vako pišen,to ja samo onako…