Nakon ča san, ka ča mi je reka da mu pošaljen,Gradonačelniku Ivanoviću posla emajliranu poruku o potoku koji izlazi na plažu Sokolana,sa slikan i popratnin texton kako bi se to za prvu ruku u dva-tri dana moglo riješit, pa da kupači više ne strepidu ča bi jin moglo novega iz cijevi doletit,još koja pantagana,oli opet govna ili čako poput one boce od cidokora ili još gore,ono ča se ne vidi,ali je u vodi prisutno…

Eto,pohvalno,koliko godin ima da se o ovomen problemu govori i niko da trzne, a danas smo se našli eto baš tote, kraj otega problema.

Jučera na licu mista,tamo kraj štrike od jugovinila,našli smo se dogradonačelnica Bosančić,dogradonačelnik Benutić,upravitelj vlastitoga pogona Čagalj i ja,pa san jin kaza oto kanala uza sjevernu štriku kojin je prije odila voda,a s kojin u par dan,nakon ča se očisti bi to moglo opet i ota voda bi u odnosu na sad u more izlazila jednu stotinjak metri dalje.E i eto sad onega famoznoga,(ali), upravitelj pogona Čagalj reka je da se to ne more radit jerbo da je oto o Hrvaski vod i da bi oni to tribali napravit,a ča bi to tribali napravit? zar za očistit oti kanal triba nji zvat,ne more grad?ne more kad je njijovo,a dobro,a kako je onda kad se pribacala cijev od kanala zbog izgradnje dvorane to radija neko drugi,ne oni,dobija san odgovor da je grad nji pita je li moredu to radit pa su jin oni dopustili,a dobro,a oli grad ne more sad pitat i za ovi kanal? e,(ali) sad eto drugoga problema,upravitelj pogona Čagalj,sada salazi doli do kanala i govori kako oti kanal nima gabarite za primit otu vodu (dubina 50cm – širina 1 metar)? a kako nima kad je otin kanalon ota voda i prije odila,pitan ja? ne,ne,ovi kanal nije dovoljan za količinu vode koja dolazi i to je to,ma čekaj malo (ovo ja sad dokle pišen razmišljan) ko je to od nas jučer koji smo tote bili moga doč do zaključka da oti kanal nima gabarite za skupit otu vodu? niko,ljudi tučedu velike škole za take proračune činit,tako da mi je ta brzinska izjava bila malo čudna,ali eto,bar san dobija odgovor da če se ništo provat učinit,a šta vidičemo,evo ja iman prijedlog ča san ga reka dogradonačelnici Bosančić s kojon san osta još par minuti pričat,ok ovo je od Hrvaski vod i nemore se dirat,a onda neka se ono doli di ulazi na plažu kanalizira sa cijeviman dalje od plaže, u dubinu mora,(a sad evo opet dokle ovo pišen razmišljan)nebi ni to baš lišo prošlo,najvjerovatnije bi sad to spadalo u pomorsko dobro i eto opet problema?

Kako bilo, ja eto virujen da če gradska vlast sve učinit za ovi problem,ako ne za stalno,onda bar za prvu ruku nekako riješit,pa da se na plaži više ne pojavljijedu ovakvi prizori ka ča čete ji vidit doli na slikan.

Na ovoj doli slici se vidi razna šporkica,fekalije ili po našu, govna:

A pogledajte na ovoj doli slici koliko samo jema dičice i to baš koji metar od otega famoznoga potoka iz kojega svako malo izleti koje iznenađenje.