Zanji put je,ako se sičate,oba ovemu bila rič kad je počeja ra…,ma nije rat,več specijalna operacija Rusije nad Ukrajinon,jerbo se počela čutit destabilizacija u opskrbi sa goriviman,ali se to nakon određenoga vrimena uspilo stabilizirat,sad,kako su Amerikanci i Izraelci krenili na Iran,situacija je puno složenija nego ča je to bilo i ko zna ča če od svega ispast,jerbo ni najmanje ne izgleda dobro,a kako stručnjaci govoridu,strašidu nas,da ako se vako nastavi,biče dramatično,jerbo ne samo ča neče bit dovoljno nafte,nego se spominje kako če zbog toga i spize pofalit,a pitanje je ča če i sa strujon bit…

Na to kakva če nan bit budučnost,koju nan,ni kriviman ni dužniman,niko drugi kroji,kako nan oti stručnjaci,ako se eskalacija nastavi, govoridu,nečemo baš puno tribat čekat,a kako moremo jutros vidit,razgovor između Amerikanac i Irana nije urodija plodon,tako da sad cili svit stoji atento i čeka kako če se situacija dalje razvijat…

Kako vidimo avijokonpanije več prizemljijedu avijone,reduciradu letove jerbo je kerozin krešija skoro pa sto posto,em ča je kerozin sve skuplji,em ča ga,ako se situacija ovako nastavi,tamo u peti-šesti misec više neče ni bit,jer je zbog specifičnosti kerozina,dosta konpliciranije skladištenje u odnosu na druge vrste goriva…

A šta se tiče benzine za aute,oče li ga bit,koliko če koštat,jema ji ča govoridu,ma koliko bude,samo da ga jema,jerbo najskuplji benzin je oni kojega nima,tako da se sve više spominje i ona “popularna” par-nepar solucija koju smo jemali od sedandeset i devete do osandeset i druge godine u bivšoj jugi,a šta je značilo da su oni sa zanjiman parniman brojeviman vozili na parne datume i obratno,a nakon toga,do osandeset i pete godine su nan uveli bonove,misečno je svako auto moglo dobit bonove za četrdeset litar benzine i opet se stajalo u kolonama za oto benzine kupit,a sad zamislite,samo četrdeset litar misečno,nema veze jeste li vozili fiču,oli ladu,koja je duplo više trošila,a ja taman položija vozačni i naravno,ocu je dobro došlo kako ne mogu vozit fičeka,jerbo mu oto benzine triba za odit na posal…

A mi se moremo samo nadat da se ovi crni scenariji,ča ji spominjedu,nečedu ostvarit.