Ovi petak je u selu bila fešta o maškar.
Eto vidiš,mislija san se fermat samo na ovoj gori prvoj rečenici,jerbo mi uvik pribotunadu,zašto si napisa ono nako,zašto ovo vako,pa onda da preferiran ovega ili onega,a znate ča,a ajdete lipo …
Bilo komen drago oli ne,maškare kad činidu u selo feštu,a tako je i ovi put bilo,jemadu najviše svita,oliti ga posjetitelji,a ovo ča se tiče ponude spize,sve su to nijanse,jerbo ča je jednomen pripečeno,drugomen je taman,ovemu jušno,a on voli ugusto…,da dalje ne nabrajan jerbo bi me daleko odvelo,inače je na repertoaru od spize bilo čovapčiči,srdel sa gradel,Soparnik,a bilo je i skuvanoga,pa se tako moga izist crni rižot,Boškarin ala Pela,ča ga je ka sami naziv govori,učinija Pela,a nakon otega svega moglo se zasladit sa prencipalaman ča su ji činili Mate i Šime,pa je onda bilo i lutrije,vatrometa i to je to.E.