Ferma me jučera ovi jedan šta stoji na Podvorju pa mi govori,da bi one vriče sa nulon šta su jin tribale kad je plavilo more,odnit ča i da je niko od stanari zva doli u opčinu za da oto odnesedu i da jin je reklo da neka se strpidu,da jema puno nji na bolovanju,samo jedan kamijon…pa da bi to mogli za dva miseca učinit,a govorin ja njemu,a čekaj malo,a zašto to sad odnit ipak je zimski period i more se dogodit da opet poplima,a on meni da neče,da se to događa kroz jedanajesti misec,a pa san se tote sa njin zakačija,a ma koji jedanajesti misec,događalo se i u proliče,čak mi je ostalo nigdi u pančenju da je i u lito znalo bit,a on na to manija rukon,malo mi je čudno,stoji doli,a nezna kako nima pravila i još je zaboravija da se to u bilo kojemu periodu u godini more dogodit…

Ali ovo šta je reka da ote vriče sa nulon triba maknit, se slažen,ali ne ji odnit neznan di,jerbo se događalo da su ljudi ka ozebal sunce čekali ote vriče za isprid vrat ji meknit i događalo se i to da se sa vričan okasnilo i more je več počelo u kuče ulazit,pa se događalo da jin je znalo reč kako ništa od vrič sa nulon jer je ovi ča prodaje žalo zatvoren,jerbo je trevila subota popodne,nedilja oli praznik…
I opet moran po ko zna koji put ponovit kako san još u prošlomen sazivu Mjesnoga Odbora pridložija da se ote vriče,punpe i ostalo držidu uskladištene u bivšemu dučanu (Slavić),tako da se ne gubi dragocjeno vrime,jer se znalo događat da minuti budedu presudni…i da u datomen momentu civilna zaštita bude na raspolaganju,a onda mi je rečeno kako civilna zaštita nema ljude koji čedu oto radit,več oni-čelnici ote civilne zaštite alarmiraju žurne službe,(zanimljivo,a kad je bila korona onda je civilna zaštita najedan put imala ljude koji su šetali okolo i zabranjivali nan i ovo i ono i još su usput za to bili i plačeni?)a prostor di bi držali oto ča san ja reka,je priuzeja muzej,a kako mi ka MO neznamo za da je oto prostora pripalo muzeju,e to se onda slijegalo ramenima,eto ukratko o tomen,ali jema grad tote blizu još prostori,a sad evo doli za ovega,jerbo san mu reka da ču pronač pa meknit,a i za sve ostale koji zaboravljadu,par textov di se vidi kako more nima niki određeni period za dizat se i spuštat,več to čini onda kad mu dođe. Znači vidi se da se more izlivalo i u jesen i zimu i lito i…

I opet ljudi u staromen dilu sela (Getu) nisu spavali,jer su bili u straju kad če jin more počet u kuče ulazit
Postavio:admin
Datum:February 4, 2019 9:50

Ovu nedilju rano ujutro okolo dvi ipo-tri ure,kako su mi ovi muž i žena pričali u kuču jin je počelo ulazit more,a oni su samo bespomočno gledali i micali ča se moglo,da bar eto,šteta bude ča manja,čak je ljudiman i u aute more ulazilo,ali neču puno više o ovomen pisat,evo ču sad i u buduče samo Copy paste,pa evo opet ono ča san lani u treči misec o tomen pisa,samo ovi put za razliku od prošloga, nije padala kiša i još ništo moran reč,a to je da san na prvoj sjednici Mjesnoga Odbora od presjednika zatražija da radi ovakvi problemi Civilna zaštita Grada ima spremne punpe-vriče sa savuron koje se moredu smistit u bivšu butigu o Slavića i ljude koji če našiman miščaniman u oviman teškiman momentiman pomoč.
Očito kako ovo moje pridloženo nije niko ozbiljno svatija.

More se danas opet izlilo
Postavio:admin
Datum:November 5, 2023 11:45

Fermalo me nji dvoje u selo,nisu muž i žena,a niti su iz iste kuče,ali oboje stojidu u staromen dilo sela-getu,pa me unakrsno ispitivalo,a je li, nikidan si napisa kako ste vi iz mjesnoga odbora donili odluku da neka prva faza uređenja obale-rive bude od mula do banane,e,a dobro kad ste to donili odluku,a biče tu okolo godine daan,a ča su van oni iz bile zgrade odgovorili na tu odluku,a nisu ništa,kako to nisu ništa,znači neznate jesu li oni uvažili tu vašu odluku,a neznamo,a oli vas ne interesira,jesu li uvažili otu vašu odluku,a interesira,a onda zašto niste poslali dodatne upite,kad vas to interesira ili ste samo tako izglasali da se o tomen morete falit,a uopče se u ovu godinu daan niste potrudili da doznate,niti ste išli tamo do nji,kad oni nisu poslali van,ča mislidu o takvomen prijedlogu,a ča bi ja sad ovde van moga reč,a da ne iznosin ono ča se reče “šporku robu” iz mjesnoga odbora,a ništa,sve je nan jasno,a ča van je to jasno,a to da smo se veselili kako ste izabrani,a dogodilo se “sjaha kurta,da uzjaše murta”,a jadni smo ti ka ča jesmo,niko od nan računa ne vodi,briga koga ča nan je more,evo u tri dana dva puta u kuče ulizlo,a vi do kraja mandata sidite i čekajte odgovor,a mi čemo jema bit zbog ovoga problema u prosvjede morat odit,a šta van ja sad ovde mogu pametno reč,ni ja sam,ka ni vi,nisan zadovoljan sa dosadašnjin radon novoizabranoga mjesnoga odbora,a ako budete tribat odit u prosvjede,eto i mene sa vaman,bilježin se za misto u prvomen redu i to da jedno od vas dvoje bude sa live,a drugo sa desne bande od mene…

Opet su uličice u staromen dilu sela bile pod moren
Postavio:admin
Datum:August 1, 2019 12:04

Nikoliko daan je tlak zraka varira pa je tako i more išlo čas gori čas doli,a najgore je bilo u nediju kad je uz podizanje mora učinilo i nevrime sa kišon,a to je situacija koja dodatno zakonplicira stanje na spomenutomen terenu,jerbo kroza raštele kroz koje bi ota kiša tribala odit u more,more ulazi u kalete,tako da kiša povečava nivo,a ujedno i opasnost o poplavljivanja kuča u Getu,ali eto,sriča,oto u nediju sa kišon nije puno trajalo,pa je ovi put taki scenarij izbjegnut,ali sa prirodon nikad nisi siguran,a ljudi ča tamo stojidu su non-stop u straju,kad če jin voda u kuču uč,a ka malo je obečanji o političari bilo da če jin se to sredit,pa ništa,a moglo se,jerbo se rješavala kanalizacija kroza kalete,a ovi problem se moga riješit uz pomoč klapni koje bi se u momentu podizanja mora mehanički zatvorile i branile dotok mora u kalete,a druga klapna bi otvarala raštele od kanala kroz koji bi kišnica išla u kanalizaciju,a dobro šta je tu je,kad je več tako,ajmo onda vidit ča se da napravit onako,”po partizansku”,odma u deseti misec kad se novoizabrani MO naša na prvoj sjednici,jedna od točak ča san je pridložija,a ostali jednoglasno prihvatili je da se,kad več do sad niko ništa po pitanu naplavljivanja nije napravija,u bivši dučan od “Slaviča” meknedu punpe,vriče sa nulon za zečje nasipe… i da Civilna zaštita bude ta koja če na svako naplavljivanje bit tote na raspolaganju,ali naravno,pošto cilo vrime “niko” omalovažava odluke Mjesnoga Odbora,tako je evo prošlo cili devet miseci,a ni do današnjega dana se ništa po tomen pitanju nije prominilo,ali,kad se na polak godine na Gradskomen Viječu donosija rebalans proračuna onda su za financiranje civilne zaštite Kaštili namijenili osandeset iljad kun,sa naznakon kako je Grad Kaštila osnova postrojbu civilne zaštite i dužan ju je opremit i stručno usavršavat,pa se eto nadan da če sljedeči put kod slične situacije naši miščani napokon dobit njiovu pomoč.