A jesu mislili ono kako je jugo puvalo,da če kišurina ulit,kako vidin koji lipi komentari po društveniman mrižan kružidu,jema oni ča bi da su mogli prizvat i matune na Matejušku oti dan volili vidit da padadu i da svečanost okolo otvaranja Smojinoga spomenika upropasti,ma jin se snovi nisu ostvarili,sve je išlo onako kako je tribalo,svečano i veličanstveno.

Govoridu kako na otvaranju Smojinoga spomenika na Matejušku nije bilo puno svita,bilo je taman onoliko koliko triba bit,Smoje je živija skromno,govoridu činija je ovo i ono,bija je )griješnik( sriča je da ovi sadašnji „veliki vjernici“nisu živili u vrime Isusovo,ajme ča bi ga bili stinjan izbubali,sad če koko reč, ma vidi njega mudrijaša,a dobro je kad san ja mudrijaš,ma nime ni briga kad unaprid znan ko če me mudrijašen i drugiman ukrasniman pridjeviman nazivat,ma takvi isti nisu ovi zanji dan ni za Papu Franju imali lipe riči,(naravno,ovo su oni ča su veči pape od pape) ajme meni koji komentari, nakon šta je na audijenciji reka (Koliko često vidimo sramotu ljudi koji idedu u crkvu i tamo su svaki dan,a nakon toga žividu život u mržnji i ogovaranju drugih ljudi i poručija onima koji ne želidu živit istinski vjeru neka onda radije žividu ka ateisti.

Valjda su se oni pusti komentatori šta su povodon otvorenja spomenika o Smoji razne gadarije pisali,našli u ovoj papinoj poruci?Ili,ma nema veze ča Papa govori,oni če učinit ono šta jin je na umu,ali zato su dobro apsolvirali iz vjere ono šta jin odgovara,lipo če se ispovidit,pa onda opet moredu sve po starome…

Smoje jugoslavenčina,ma čekaj malo šta to znači jugoslavenčina? Kad oti samozvani „veliki“očedu nikoga uvridit onda jin je ka za najzgodnije reč kako je oti jugoslaven-čina, a vratiču se sad u doba korone i kad je isprid pošte u naše selo bija jedan od prosvjedi iz razloga jerbo tamo nisi moga uč ako nisi jema potvrdu o cijepljenju ili onu da nisi pozitivan,a pa je jedan ča je tote prolazija nonšalantno za ote prosvjednike reka,vidi jugoslaveni,zanimljiva konstatacija,ovi je sa oton svojon izjavon u svojoj glavi ote smistija na svoje misto i zadovoljan krenija u poštu di je ponosno pokaza svoju potvrdu pokazavši biče sa otin kako je on oni „veliki“ Hrvat,a zanimljivo je kako je u toj grupi prosvjednika bija i jedan,koji je kad je počeja rat,rasproda sve u dučanu kojega je jema,proda je i konbi kojega je jema,kupija pušku i ne čekajuči da ga ko zove,ka dragovoljac iša u Domovinski rat…

Antihrvat,ma bravo,naravno vratimo se sad na početak ovega texta i na one „velike“bilo da su Hrvati ili vjernici i sad pazite,takvi su bili u stanju i Vladu Gotovca nazvat vakin i nakin,pa se dogodilo da ga je dokle je drža predizborni govor u Puli sa pozornice srušija Hrvatski vojnik,alo,Vladu Gotovca koji je jedan od rijetki za kojega se more reč kako je Velika Hrvatina, bacilo je sa pozornice jerbo je kritizira politiku ondašnje vlasti,kad je vidija da se gre ukrivo, da to nije ono čemu su Hrvati stolječiman težili,a i biče Smoju nazvali antihrvaton, jer je po njiman on kriv da od Hrvatske imamo ovo, šta imamo danas…?

A oni ča nisu Smoji došli na sprovod iz gori navedeni razlogov,za nji neču niti tražit riči s kojiman bi ji opisa,jerbo bi na kraju ispa gori od ovi ča ga kendaju,a zanimljivo među njima su bili i oni koje je kroza svoje serije Velo i Malo misto ono ča se reče, „lansira u orbitu“ koji su nakon toga kod dvadeset milijuni svita bili popularni,a početkon devedeseti ga se odrekli,oni jugoslaven,antihrvat…znali su o njemu svašta govorit,natjecali su se,ka i danas ča se natječedu,ko če dalje pljunit,ali čekaj malo,a ča nisi onda govorija kako nečeš ti glumit u seriji ča je Smoje scenarij napisa,kad si o njemu tako mislija,pa ka to je jedini slučaj i u naše selo se od početka devedeseti na ovamo gledalo ko komen gre na sprovode,za nevirovat,kako je sve kvragu išlo…????

I ovo sad šta se nakon sedan dan od otkrivanja Smojinoga spomenika dogodilo,da ga je prolilo plavon pituron,ako je bija komunjara…,a zašto ga nisu crvenon pituron prolili,a to ča su mu okolo vrata mekli šal od nogometnoga kluba partizan,e tote su falili „ceo fudbal“,jerbo se zna da je Tuđman bija presjednik fudbalskoga kluba Partizan, a Smoje je bija jedna veeelika HAJDUČINA,pa on je i scenarij za seriju Velo Misto svomen voljenomen klubu učinija,tražija san po bespučiman interneta pa nisan uspija nač, koliko se to klubov u svitu more pofalit ka Hajduk, da jemadu svoju seriju u kojoj se govori o samima počeciman,osnivanja,davanja imena Hajduk(zajedno sa Davorinom Rudolfom za pedesetu godišnjicu Hajduka piše njegovu monografiju)…,uz Velo nad kojin je visija „mač“ cenzure,učinija je scenarij i za Malo Misto,koje je bilo početkon sedandeseti godin,hm,vrlo turbulentno razdoblje Hrvaske povijesti,a na televiziju se prikazije serija Malo Misto,za koje su se onda,a i danas se svi pitadu kako se uopče dozvolilo da ota serija ugleda svitlo dana,jerbo je kroz epizode ote serije o politici i političariman kroza humor reka sve ono o vlasti,ča niko nije smija niti promislit,a kamoli glasno govorit,(sičate li se zastave koja je bila na zidu na kojoj je zvizda bila deškvartana,nije krak sta prema uzgor,več nakrivljeno),a toliko je bija dalekovid,da če ota serija u nas i za sljedeči milijun godin,ča se politike tiče,bit ono,top …

Zašto se Malo Misto nije u početku odma zabranilo,kad se zna da ništa nije moglo ič na televizije ako nije kroza sito i rešeto prošlo,a zato jerbo je ota serija funcuski učinjena,da je oni onda nisu uspili skužnit,radi humora kroza koji je Smoje to sve sročija i ljubavne priče Bepine i Luiđija koja se kroza seriju protiže,a sa kojiman je zaokupija možjane oti likov koji su jemali „nožice“ koje na našu veliku radost, nisu koristili????

Govoridu da je bija uvik kontra,a je li to uvik kontra ili je to kritiziranje onoga šta nevalja,kako znamo uvik se zalaga za maloga čovika,nije poput inih pokondireni tikav,u vrju svoje slave zaboravija okle potiče,a moga je bija i drugačije,suprostavlja se politici i političariman,pa je tako bilo i kad se zamisto imena Dalmacija,uporno namečala promjena u južna Hrvatska…
41.godine bija je u vrju gimnazijalac koji su učinili antifašističke prosvjede protiv školski svidožbi koje su bile talijanske,bija je u SKOJ-u i kad je vidija kako to ide,iša iz njega ča,govorili su,da ča je on zna od povijesti,pa se tamo tija pačat i kako je nepismeno pisa, kad ono diplomira je povijest i Hrvaski jezik,a zanimljiv je podatak kako je bija i na teologiji,ali nije dugo izdrža…

Poznato je ča je sve napisa,di je sve pisa,koliko je scenariji učinija,knjig napisa,kazališne drame učinija,humora učinija…zar misli koko da je samo onako,tinbar i poštansku marku zaslužija,nagrade za učinjeno dobija,spomen sobu i svoju ulicu ima… i ka šlag na kraju spomenik dobija,ne zato jer je priko veze to niko uspija progurat,več je sa svojiman djeliman to zaslužija,kroza Velo Misto učinija je grad Split posebnin i drugačijin od svi drugi misti i gradov na ovemu svitu,čije stanovnike niko ne more,onako kako bi tija, po svoju, „misit“… i zbog toga je Smoje zasluženo dobija u Splitu na svojoj Matejušci spomenik na kojega su se več počeli iživljavat,ali če to ujedno bit veliki izazov i za Split i Spličane,koji se sad tribadu dokazat,je li Smoje bija u pravu, ili…