Jutros okolo jedanajst ipo na vrata od banke su zalipili obavijest na kojoj piše kako 23. i 24.jedanajestoga-četvrtak i petak, nečedu radit zbog preseljenja,a od ponediljka 27.ovega miseca če počet radit na lokaciji Cesta Franje Tuđmana 772,šta bi po broju to tribalo bit u Lukšiču.

Znači obistinilo se ono šta se več ima i godinu ipo šuška,da banka iz našega sela gre ča.

Za one koji pitadu da ča Mjesni Odbor čini,mogu samo reč kako san onda kako san to pri godinu ipo dozna oto pitanje postavija na Mjesnomen Odboru,ali ka ča znate praksu,Mjesni odbor ne more ništa ni tamo di more čako,a kamoli more tamo di ne more učinit ništa,ali more sad kad je prostor prazan pridložit da se u njega vratidu penzioneri,da kako vratidu,a lipo,jema ji ča su zaboravili kako su pri nego je banka tote došla oto bile prostorije od penzioneri,a penzioneri jemadu sad i svoju Udrugu i tražidu adekvatne prostorije,bez skal-prizemlje di če svi moč doč i oni zdravi i oni sa štakan i oni sa koliciman i oni…,jer to su naši roditelji,didovi,babe,tete,barbe,susidi,stari i bolesni ljudi koji su iza sebe ostavili ovo šta danas imamo,pa i miritadu prostor da moredu lipo u teplo sa svojon generacijon popričat,zaigrat s njiman na karte, gledat utakmice,koju seriju,gledat vijesti i zajedno pljucat po televiziji…
A jema i par godin da san oba tomen problemu u MO govorija i uvik je bilo kako u selu nima ništa slično takvomen prostoru,pa če bit zanimljivo vidit ča če se sad na ovi prostor reč.

Pitadu po selu,ka ono ja san u MO pa bi triba znat,da če tote bit niki restoran,kafič,picerija…?

A ča mogu na to reč nego da niman pojma,a i kako niko več zna ča če tote bit,a da Mjesni Odbor oba tomen nezna ništa,dobro je da se nije znalo onda kad su imali i vamo i tamo večinu,pa su sve među sobon rješavali,a ako se to i sad bude događalo,e znači da ne radimo svoj posal onako kako bi ga tribali činit i da je definitivno sve po staromen,onako kako je i pri bilo,ali ugazimo ono ča se reče,na balun,ne brzajmo sa zaključcima…

Evo doli ova slika iz Monografije našega sela di su penzioneri imali svoje prostorije: