Ja gori,a on sa lopaton u ruci i privrača blato koje ga je deboto pa zatrpalo. A ča je? čuja san u selo da te malo poplavilo? a je dlakicu govori i kažije mi kučicu ča mu služi ka skladište za razni materijal,a unutra puno blata.Nije to ništa,govori mi,a da vidiš kako je to bilo jučera.E sad prolazimo kroza maslinik,a pitan ga ja da kakva mu je ovo kaki boja zemlje?pari ka da je glina. A to ti je visokokvalitetna zemlja,onako če ironično, svaka malo veča kiša podari me sa ovon lipon,puno lipon zemljon i napravi novi sloj tako da mi je zemlja svaku godinu koji centimetar viša. A ča ti je ovako mokro u plasteniku,pitan ga ja? Da ča mi je mokro?A to je unutra parilo ka bazen i jema ovo biče okolo četiri godine da kako dođe malo veča kiša meni pogotovo evo ovi prvi plastenik bude pun vode tako da mi je u ovi par godin pa prinos za jednu četrdesetak posto jerbo ča stavija da stavija ili počme gnjijat oli žutit od vodurine koja u njega uđe i usput odnese sa sebon gnjoj i sve ostalo valjano tako da biljka ostane bez spize kojon je triba naranit za da bi mogla rest.

I govoriš da jema jednu okolo četiri godine da strepiš posli svake veče kiše i čekaš koje če te novo iznenađenje strefit? A je,pogledaj ovo puta navr moje zemlje,eno gori se iskopa kanal di bi voda tribala prolazit pa opet ni to nije puno pomoglo,ča oče reč da nema pravoga rješenja dok se ovo sve, onako po zanatu ne dovede u red,a dok to ne bude ja moran vidit šta ču poduzet,jerbo cilo vrime trpin štetu i dokle to govori usput mi kažije  prston kanal koji gre između plastenikov i služi za odvodnju vode,a koji je posli one nikidan kiše koja mu je u njega nanila blato sad zaštopan tako da če mu sljedeča kiša pa bila ona i mala zbog ovoga stvorit dodatni problem.

E,a ovi podvožnjak u Vriliman je najniža točka di se oti mulj-blato otega dana nataložilo.