A jeli se sičate lani kad san pisa text o Spličaniman koji su prošle godine u organizaciji Udruge Sunce na Dan bez aut sa biciklan učinili đir od Banovine do Žnjana, a čiji je cilj međuostalin bija i ukazivanje na nedostatak biciklistički staz u gradu Splitu.

I ča se ovu godinu dogodilo? A ove godine grad Split je svečano otvorija okolo jedanajs kilometri obilježene biciklističke staze sa svon pratečon siglalizacijon kako onon horizontalnon nacrtanon po kornižiman, i crvenon rigon na zebran (jer inače priko zebre moreš biciklon jedino kad sađeš s nje i voziš je u rukan), tako i onon vertikalnon,di čak i na semaforiman tamo di je prije bilo crveno i zeleno za pješake, sad je to konbinirano, sa nacrtanin pješakon i biciklon.

A di su tote Kaštila? Jemamo nigdi okolo petnajestak kilometri ceste ča prolazi kroza sedan naselji koja je vrlo opasna za vozikat se po njoj biciklan, pa se ljudi vozidu po kornižiman koji su po zakonu određeni za pješake, tako da svjesno kršidu zakon, znajuči da zbog toga moredu dobit novčanu kaznu, ali, bolje i to nego da te koji autobus ili kamijon turne u fošu,pa se onda ti češi.

Ali, kad bi učinili isto ono ka ča je to i Split učinija, a puno Hrvaski gradov to več ima odavna, a to je, podilili korniž na pješački i biciklistički dijal, onda bi se svrstali u gradove koji su još primamljivijiji turistiman koji među ostalin, kad gledadu destinaciju u koju dolazidu onda jin je večini u samome vrju prioriteti i to jeli oto misto, oli grad jema i biciklističku stazu, jerbo puno nji na aute jema po jednu, dvi, bicikle za cilu familiju, a oni ča ji ne moredu nosit sa sebon ji iznajmljijedu i to je posta unosan posal. A eto, šta ču?ja iša okolo kole i iskoristija onu: “Dajte mi dijete da se slikam”.

P.S. I najdraže mi je kad koko reče,eno jin na gori pa neka se po Gaju vozidu. A ja bi jin reka da ča se toga tiče Split jema puno bolje uvjete na Marjanu di je pusto biciklisti, roleri, skejteri…,a ča se tiče staz na Kozjaku,nji triba osmislit za brdski biciklizam i to neka bude jedan od načini kako u Kaštiliman produžit turističku sezonu.

A ovo doli je text od lani ča san ga pisa:
Datum:September 22, 2014 8:44 pm
Jučera je u organizaciji Udruge Sunce okolo dvistotinjak Spličani povodon dana bez aut na biciklan učinilo đir od Banovine do Žnjana dug oko devet kilometri,a cilj ovoga je bija ukazivanje na nedostatak biciklistički staz ka i o skupoči karat na trajektima za prijevoz bicikli na otoke zašto su kad su prolazili kraj trajektne luke zvonili sa zvonciman.

A kakvi problem imaju Sučurani-biciklisti koji su svaki dan u sve večemu broju.
A problem je takvi da ako očedu vozit biciklu i bit sigurni onda ako nimadu porta pake na krovoviman bicikle uguravavaju u aute i gredu do Marjana,oli Žnjana koja su dva nama najbliža mista na kojiman moreš vozit biciklu,a da ne strepiš oče li te turnit koje auto.
Oni najhrabriji se uputidu put Kaštili,a pošto Sučurac nije rivon povezan sa ostatkon Kaštili onda je to prava avantura jerbo po zakonu ne smiš vozit biciklu po kornižu jer je predviđen za pješake,a vozit se biciklon po cesti je isto ka da igraš “Ruski rulet”jerbo kad mimo tebe prođe autobus oli kamijon ne da nije ugodno,nego puno puti te na bicikli zna i zanit pa more bit svakakvi posljedic,tako da ko je jedan put čutija takve gušte onda se više nikad neče usudit tako ceston vozit nego kako vidin večina ka šta i ja činin vozidu onin sjevernin kornižen jer radije ču platit i kaznu nego bit na cestu sa glavon u borši.A jema po selu i razni razmišljanji,ka prvo zašto se kroza bivši Jugovinil prije nego ča se je proda nije odredila trasa di če bit šetnica-poveznica sa ostalin dilon našega Grada ili npr.da pošto je to vazeja privatnik zašto bi sad neko ko je kupija oti teren dijal da za šetnicu-poveznicu sa ostatkon Kaštili,zato jema prijedlog, ka,a zašto se ota šetnica ne bi učinila doli na južnu bandu di se more nasipalo i po svemu bi to tribalo bit ka pomorsko dobro,a ingerencije nad otin jema županija-država.Itd,itd,jema tot razni idej,ali svaka završava na isto, da triba učinit šetnicu i spojit Sučurac sa ostatkon Kaštili pa da lipo moremo bez straja od aut điravat kroza Kaštila.E i onda kad san to u Splitu vidija odma mi je palo na pamet,a da i mi u naše selo napravimo nešto slično ovomen i sa rolaman, biciklan, skejtiman, romobiliman i na noge učinemo jedan “defile”?