Sve je počelo dolaskon četiri kara koja su se parkirala doli na rivu i fešta je u konobi od Matele mogla počet.
Skupilo se tote puno oni iz sedme sile,blicavalo se,snimalo,pisalo ča to Ivan jema za reč,a on je to onako po svoju sve lipo pojednostavnija i reka da nije ovo ono industrijsko štrc-brc vino,več je ovo vino rađeno s ljubavlju i kako se ti sa njin ponašaš takvo če ti i bit,kad ga popiješ to ti je ka likarija, odma si dobre volje i dobro je za cirkulaciju,vidi mene u kratke rukave (smije se)…

Pa se moglo čut da je ova godina bila dobra,a u Ivanovoj konobi se smistilo okolo pedeset iljad litar otega napitka,okupljeni su lizali pijate koliko su tripice bile dobre i naravno,posli to sve lipo zalili sa Kaštelanskin Crljenkon,a nakon toga selo se na kare koji su učinili defile selon i krenili nizdol prema Kaštiliman u obilazak konob.