Puno nji kuka kako je u ove dane od blagdani u nas u Kaštila sve nikakvo mrtvo, pa se onda uputidu put Splita di moreš osjetit oni pravi blagdanski šušur,a pogotovo na Badnji dan i na Šilveštrovo. Evo npr.jučera,na Staru godinu đir po gradu je izgleda ovako: na Prokurative je bilo veselo uz bajs,armoniku,bubnjeve…, Riva-doček dičje Nove godine-desete po redu, točno u podne,kad su dica umisto vatrometa u zrak pustili šarene balune,pa onda pivanje ispod ure di se na Badnjak i Staru godinu skupidu glasovi iz razni klaap i to bude “ono ništo”,a morete sad zamislit na jedno misto nikoliko tenori,baritoni i basi,a pravilo se zna,da prvi tenor potegne,drugi nastavi sa tercon niže,baritoni to sve začinedu popunon kvintakorda sa basoviman koji to sve zaokružidu u jednu lipu skladnu melodiju nazvanu klapsko pivanje.I kad čujete jednu dvadesetak glasov iz razni klap,zajedno sa sviman oniman koji se tote nađedu i zajedno s njiman zapivadu,e to je onda ono ča se reče praznik od klapske pisme i zato nije čudno da dokle to sve skupa traje misto ispod ure bude totalno blokirano i niti se more vamo niti tamo i svi se gužvadu, pivadu i guštadu.

Malo dalje,doli na Vočni trg, opet je bilo veselo uz nike mužikante koji su prisutne držali u plesnomen ritmu,a doli na rivu nidir okolo ure ipo isprid pozornice di se malo pri dogodila dičja Nova godina pisme je miksa disko đokej,a tamo u “Mramontovoj” četiri mlada saksafonista-kvartet na sopranu,altu,tenoru i baritonu iz partiruri su izvukli ono naj,a da su dobro odradili posal mjerilo je ča su jin cilo vrime u kufer pineze bacali i moran priznat da od puno nji ča san ji moga vidit po Splitu da sviradu, ovi su u samomen plafonu,a isto tako puno daleko od nji nije ni vilionistica koja na električnoj violini privlači pažnju svirajuči partiture priznati svjeski konpozitori.

A, u tri ure popodne je na Pjacu bila totalna ludnica jerbo se uz muziku, pismu,ples,konfete i snig, (e dobro ste čuli snig,posli kojega je kad su počeli itat,nastala prava euforija oduševljenja slavija),dogodija,a sad bi se moglo reč i tradicionalni doček Spliske Nove Godine u tri ure popodne, poslin odbrojavanja, nakon čega su se svi počeli grlit i ljubit,a bome su se otvarali i šanpanjci i plesali valceri,a stranci su u čudu gledali ča je sad ovo,a jema ji ča su i zaplesali,ka ča čete vidit nji par kako plešedu okolo termosice. I tako,ako van se da, učinite đir do Splita,je da neče to više bit ka ča je bilo okolo Božiča i do Stare na Novu godinu,ali je svakako življe nego ča je to u Kaštiliman,di je sve ka nikako mrtvo.E.

A govori mi ovi jedan iz sela ča je tote na pjacu bija da ono kad su itali snig taman je Baldasar kraj njega prolazija pa ga je ovi pita da neče valjda sad bit problema sa snigon ka ča je to bilo kad je gradonačelnik bija Kerum i govori mi kako je ovi jema spreman odgovor da su iza kantuna atento oni iz Civilne zaštite i da čekadu razvoj situacije i ako bude potribe odma krečedu u akciju. 😀 A sad jeli on to meni laga ili nije neznan,ali virujen mu ka ča je i on meni povirova kad san mu reka da neka pričeka pa če u tri ure vidit kako pada snig. Lipo me bija pogleda,a zna da ja nikad ne lažen i opet za ludu,ne viruje i gotovo.

Među slikan jema i nji par ča su učinjene na Badnji dan: