A smišno mi je oto ča se počelo jema dvi tri godine po pojediniman gradoviman,opčinan,mistiman… usvajat,a Split je to jema par miseci učinija.
Užon graskon jezgron se ne more nedolično obučen proč.Ma vidi ti čega smo se dositili.Najpri se plakalo da je Split tranzitni grad i kako se furešti ne zadržajedu,pa kad se napokon dogodila expanzija od turisti i ljudi nakon zatvoreni fabrik našli način za priživit kroz iznajmljivanje, (puno nji i stanov u kojiman stojidu dokle su oni u parku ili na kojoj plaži odispod šatora)sad se niko sitija u turističke destinacije turiste u red dovodit i ako kojin slučajen prođe bez majice,oli u kupačemu,onda če mu se lipo naplatit kazna?

Jo koji smo mi moralisti,samo još to tribamo učinit i s otin smo zaokružili i sve mekli na svoje misto,a koliko ji samo jema ča za se mislidu da su baš oni ti koji se “stinon moredu mašit”,a ča više ističemo tu svoju moralnost,tako sve više jema lopovluka,na svakomen kantunu se gleda di če ko koga zajebat,pa zbog materijalnoga ne govori brat sa sestron,brat sa braton,sestra sa sestron,ženidu se iz računice,tako da ne čudi kako se svaki treči brak raspada,a svak svakoga če privarit di stigne,pa tako sin,oli čer,nakon potpisani darovanji izbacijedu mater,oca,babu,dida,oli tetu… iz kuče na ulicu,legalni vlasnici nekretnin legalnin, mukotrpnin i dugotrajnin puteviman moradu dokaživat da jin je prevarant na nelegalan način uzurpira njijovu imovinu koja je sad njegova…

Ide se na službene i druge pute i govori se ženi oli mužu da greš na jedno misto,a onda se slučajno pomoču koje snimke,oli priče ili svidokov dozna da je dotični-a laga-la i bija na sasvin niko drugo misto,ljubavnici i ljubavnice samo ča ne počmedu iz paštet iskakat.
Pa onda se oče prividno prikazat kako ti je stalo do drugoga i njegove nevolje,a ustvari te briga za nj,a važno ti je da je tebi dobro i lipo,a njegovon se nevoljon hraniš,naslađiješ i služi ti za tračanje.Mladi prema starijiman više nemadu nikakvoga respekta,iz doma izlazidu u jednoj robi,onoj ča odgovara ocu i materi,a onda se u autan,portuniman,iza kantuni priobučijedu u ono u čemu oni očedu bit,vanka izlazidu na jedno misto,a doma lažedu da grededu na drugo misto itd.itd.A mi se zabavljamo odlukan o kažnjavanju oni koji če u kostimiman ili bez majice proč kroz grad,jer smo mi veliki moralisti i na oti način nas vriđadu?

A ma je li mi to mislimo da smo ono ča sami sebi zakonon,oli direktivon namečemo da bi tribali bit?

Ma koji smo mi da ne rečen ča?Pari mi se da ako vako nastavimo ,koko če se sitit da bi bilo opet dobro uvest da se, ka ča je to bilo tamo nigdi do 1939 muški i ženske na odvojeniman plažaman kupadu,a mogle bi usljedit i zabrane šetanja zagrljeni,držat se za ruke,jerbo tot automaski jema niki primisli ili ne daj Bože se slučajno na javnomen mistu poljubit.

I evo na,grad je ove dane okolo Ultre pun mladoga,neopterečenoga svita,razni kultur, koji je doša sa razni kantuni ove naše Zemljine balote,pa lipo uzmite blokiče i uvatite se pisat kazne,neka zapantidu dan kad su u nas došli,oni če nama ovde nemoral širit.