Napisa @pechina

Jesi li napisa,jesan, aj pošalji na

Evo ji na opet ka i svake nedilje i ove su se našle nji pet lajoni Marijeta Domina,Filomena, Mandina i Kate na popodnevnoj kafi koja je ka po običaju prošla puno burno.
Ajme meni, ma jeste li vidili nikidan onu svađu u Saboru? Je Kate vidili smo, sve smo vidili.
Vidili smo kako je oni tvoj Karamarko napa ove šta su sad na vlasti i pita ji da di su oti rezultati oporavka od ekonomske krize na što mu je Milanovič odgovorija da tek uvodidu reda u državi koju ste ostavili u stanju kakvom jeste. A onda ste opet Kate pitali oče li se prošek ili neče moč od prvi srpnja ka taki prodavat ili se neče moč prodavat,a ča je oti šta je pita tija ka s otin reč da su ovi sad krivi ako se izgubi ime prošek, a na to mu je Jakovina reka da di je bija kad je za prošek pregovarala njijova vlada u jedanajestome poglavlju i to još 2008 godine? A onda je ovi pita da di je…

Ajde Filomena pusti me bar ti na miru i šta je ko pita i ko je kome šta odgovorija, ono nikidan šta san gledala na aktualnome satu parilo je ka da si pase i maške pustija zajedno,ajme meni majko moja pa nako jedan na drugoga navaljijedu nebi da mu je oni sa druge bande najgori dušmanin? Bože mi prosti,a jeli oni uopče znadu da ji mi na televiziju gledamo? Je Marijeta znadu i vidi šta ji je pogodilo.

A znaš li ti Marijeta da su izračunali kako su u prva tri miseca saborski zastupnici tribali provest samo 25 radni dan,a pitan ja tebe koliko je nji bilo i oti 25 dan,kad vidiš koliko prazni misti na zasjedanjima ima,a ono sve šta ji novčano sljeduje za ota tri miseca su dobili okolo šesnajst milijuni i sedansto iljad kun. Ajme Domina šta i ti svakoga vraga znaš? A neznan ja znadu drugi pa napišedu da i mi znamo. Nego nije mene briga šta oni dobijedu,ako čedu i duplo više odo toga,nego daj nemojte se tako karat, nije lipo za vidit,jema nas samo okolo četiri milijuna i niki trista iljad,a nako se između sebe triba svađat? E dobro si ti to Mandina rekla, evo vidi nas koliko nas vela ovde ima i ništa nas ne more svadit. A Domina, je li ti to ozbiljno A?Ma pusti Mandina sad ono malo šta jedna drugu štucigajemo to mi od dragosti činimo. Ne zovi vraga,znaš da nikad ne spava. Ma čekaj šta si ono Mandina rekla da te nije briga koliku dobijedu plaču? Ma ča bi jin duplo dala? Evo ja bi pristala bit u Sabor i za pet iljad kun i onima dodaciman za odvojeni život putarinu i ostalo šta ji sljeduje pa bi jemala i litnje praznike i zimske praznike i Božične praznike i Uskrsne praznike i Prvi maja i … Dobro je Domina svatili smo te ali… Čekaj Marijeta najpri da ja ferman svoju misal pa onda reci ča jemaš,e,a tila san reč da vako ka blagajnica na kasi jeman okolo tri iljade kun i jeman lipo svaku nedilju svaki praznik …
naravno radni i to moran puno puti i kad me ne sladi doč radit,jerbo me straj da ne ostanen bez posla.

A šta češ moja Domina kad je to tako, nego ostavimo se mi ote velike politike uvatimo se problemi nas mali. Evo mi priča prijateljica šta stoji u Rimkome putu da to nije normalno kako jin vonja ulica,a svaku uru vrimena iz rupe u asvaltu ča je propa izviredu gejziri ničega neidentificiranoga u suprotnin bojan od oni dugini i ulicon se onda ne more niti proč jerbo se pritvori u bazen.
Je Kate i ja san čula,a ljudi govoridu da su svugdi zvali,a da nikoga nima za doč udunit postrojenje ča tira „oto“ vanka na asvalat. A moja Mandina strpljen spašen,a da jin je bilo podilit buvele za pribacivat se? Rugaj se ti Domina, ma ne rugan se nego znaš kako se reče kad ti je najteže triba pribacit na šalu, jerbo bi inače poludija.

A jeste li čuli onu najnoviju šta je Kerum izjavija.A izjavija je on puno toga pa neznan na što misliš. A na to da če izdat niku knjigu ča je on to učinija za ove četiri godine svoga mandata,jer se pari ka da je svit to zaboravija,pa ji prid izbore sad opet triba na to podsitit.
Ča si Kate rekla? Da če knjigu učinit? a siguro če jemat stranic ka Rat i mir? ajde Kate lipo u smokve. A ča ti to meni Filomena govoriš, nisan ja sad rekla da je on učinija ovo ili ono nego samo da če dobro sad ne knjigu, krivo san se odrazila ali eto niku brošuricu svoji djeli dat učinit.

A jeste li čuli da je Nevenka izjavila kako je Željko posta brend i da su zato turisti ovoliko navalili u Split. Ajme meni, sve bolje od boljega.Ma kako se samo sitidu? Najprin knjižica od dili Kerumovi,pa onda da nan turisti dolazidu zbog brenda zvanoga Kerum? Boožeee.

A jeste li danas išli glasat? Da jesmo li? A ko je moga propustit razmotat ono malega glasačkega lističa pari ka plakat,a dokle san opet pročitala sve liste da ne falin mačat prošlo je dabi deset minuti. Ajde Kate jemala si ti več sve zapisano koja je lista i koga triba zaokružit,da nebi kojin slučajen falila. A ma oče li mi ko objasnit zašto se ove naše stranke natižedu okolo toga ko je koga pobijedija.i pušedu se kako je ovi prišiša za cili jedan posto onega drugoga?A oli nas nečedu zajednički zastupat u EU parlamentu? Ili če svako od nji vodit svoju politiku???? A očedu li tamo sidit jedan kraj drugoga? A oče li kad se bude glasat jedni bit proti,a drugi za? A Marijeta lipo si ti ovde pitanji postavila ma ja mislin da ti niko na to ne more odgovorit,jedino Filomena ona je vako puuuno pametno čejade šta ti ona reče to ti je oto.

Znaš ča Kate,ajde pa ti doma zajebaji onoga svoga truta,a mene ostavi na miru,a šta je reč Filomena, oli čemo se opet počet vriđat odnija ti vrag cilu fami…Ajde dosta više vas dvi pa uvik se morate zbog te politike karat.Ajde Marijeta ostavi se ti mene, jadan ti oni tvoj, bidan tuče more,a ti se korteđaješ sa drugiman.A jeli Kate,a koji ti je ono nikidan na cestu auton ferma i to nije bilo kojon,nego mercedeson,ajme meniii očeš me bidnu u govna uvalit,čuje li te oni moj poludi če,a ništa samo san sela sa jednin prijateljen. Prijateljen jeli? A nisan znala da se to danas tako zove i ne korteđajen se ja s nikin jesan li ti lipo več nikidan rekla da mi je to bija školski kolega. A je,je Marijeta, i jesu največe ljubavi one iz školski dan. Domina,ajde se ti mene lipo ostavi na miru, jemaš ti to kome doma govorit. A kome to iman doma govorit? A sigurno ne onoj tvojoj maški,onemu tvome. Astii Marijeta,a oli oni moj ima koju ljubavnicu? Neznan ti ja ništa, eto vas na tamo. A kako sad eto te tamo reci mi šta jemaš za reč pa da znan na čemu san. A jesi li ti uvik govorila da sve znaš,pa onda kad ti sve lipo znaš računaj da ono šta neznaš kako se to onda nije ni dogodilo. Jeli Marijeta, nemoj ti meni ništa govorit, boje da mi se selo smije,a da ja bidna ništa neznan. Ajde lipo na ono misto i ne zovi me niti na telefon jer ako mi ispiše tvoje ime turniču slušalicu u zahod i potegnit vodu.
I sad gren ča, a gren i ja,a oli ču se ja ostat karat,a gren onda i ja,a i ja gren. A Marijeta di češ ti ,oli si zaboravila da si u kuči. A je li, to bi vi svi ka jidni išli ča,a ja ču ostat pa če ispast da ja nisan jidna iden ča u sestre. U sestre E, a ča je sad Mandina oli češ opet počet? A neču.A onda ču ja tebi reč bidan oni tvoj na oni svit je mlad i zelen iša zbog ote tvoje naravi. A znaš ča sad zapravo gren da ti nebi rekla ono šta ti jeman reč.
Aj adijo.