U nediju me ujutro,dan nakon ča smo tukli Rusiju zva moj prijatelj „sekretar“na mobitel,(u pozadini se čula nika velika graja,a to ko je sekretar znate iz prošli textov,a ovo „VI“i sa druge strane ja ili „mi“ smo nas dva počeli tamo početkon devedeseti,a od vrtiča se znamo),a ča je dušo,on meni,a ništa sričo moja,ja njemu,a jesi ti udunija onu svoju stranicu,pita on mene,a nisan još,govorin ja njemu, ča tebi nije drago ča nan je pobijedila reprezentacija i to da gremo u polufinale,pita on mene,a kako si ti to svatija da meni to nije drago,a ništa o tomen nisi pisa,a slušaj ti sričo moja,ča je“Van“toliko stalo do toga da ja ništo napišen,ajme kad čako napišen,ajme kad ništa ne pišen,a ko bi“ Van“ udovoljija,da san čako napisa onda bi te sa povečalon čitali, zareze, di san koji meka,gledali,pa bi bilo,vidi govna zašto je vako napisa,oli nije moga nako,to je jedno,a ka drugo,aj poj otvori oto stranice pa pogledaj da  gori na vrju, udarno stoji slika sa Hrvaskin zastavaman obasjaniman bengalkan, ne more stimanije nego je,e a onda je on meni okrenija da san ja to meka ultru,a znaš ča,ajde lipo pogledaj malo bolje,pa mi onda reci ča jemaš i eto,nakon par minuti zove me,je stari oprosti,vidija san,sve je nako kako si reka,naravno da je nako ka ča san reka,uvik je tako,sad gre ono famozno,(ali)isto si moga bija čako napisat,neče te vrag odnit,e i sad se ja od nedilje mislin oču li čako ili neču napisat,(ovo dalje ča ču pisat nije o mome prijatelju „sekretaru“),jerbo naravno,kad ne napišeš ono ča bi „oni“tili onda si vaki i naki,antihrvat,jugoslaven…,jerbo ča ti „oni“ rečedu to si,“oni“ su oti koji če vedrit i oblačit (rvatine) koji su se ukopali u „rovove“ i ne dadu nikomen drugomen da jin se približi,to je rezervirano za odabrane,zaludu mi je ča san pri  dvanajst godin jedva nabavija patike na crveno bile kockice koje zajedno sa bičvan od istega dezena nosin kad naši na prvenstviman igradu,mogu cilu kuču u zastavu obuč,ruku na srcu kad himna svira držat,ali nikad od mene pravoga Hrvata,ta su mista rezervirana,a moj „sekretaru“,naravno da mi je drago ča smo pobijedili i da bi volija da podignemo pobjednički pehar,ali da me prevladala euforija,nije,naravno,triba to proveselit,evo sinoč posli utaknice sa Ingležiman cili Split je izaša na ulice,ja to u svoji pedeset i četiri godine ne vidjeh,užižali su se gume,palile bengalke,od dimni bonbi nisan moga disat,uru-dvi vrimena je cili promet bija blokiran i narod se na par uri isključija iz svakodnevne kolotečine i udrija brigu na veselje,čak se govori da če ovi misec od kad je počelo prvenstvo po potrošnji priteč misec Prosinac i cca od niki trinajst milijardi kun,a  koje  smo dosad več učinili od prve utaknice sa Nigerijon,pa do one sa Rusijon,a još triba skontat promet u vrime utakmice sa Ingležiman i Francuziman.

Ali,sutra je novi dan,sa noviman i oniman stariman problemima,jer smo prezanja zemlja u EU po kupovnoj moči,a zbog toga jemamo okolo trista i dvadeset iljad blokirani,sam Bog zna koliko ji je pod ovrhan,sto dvadeset iljad je nezaposleni, niki podaci govoridu o sedandeset postotnomen siromaštvu,a tamo neko je iskoristija euforiju i sad su sve bučniji kako triba napravit jedan lipi nacionalni stadijon, sa sviman popratniman sadržajiman,cifra projekta,boli glava, pa je tako čak i premijer na današnjoj sjednici Vlade o tomen stadijonu govorija, e vidiš ti,ja nisan baš toliko euforičan,za da bi državu i nas građane uvalija u još veče dugove,pa neka me nazovedu kako ko očedu,jesan li za stadijon,jesan i to ne samo jedan, neka ji učinedu u sviman mogučiman klimaskin područjiman Lipe naše,tako da u svakomen određenomen dilu godine moredu birat na kojemu če trenirat,zaslužili su,ALI,neka se činidu onda kad svit više ne bude kopa po kontejneriman za da bi dici mogli koru kruva kupit.

Na kraju bi malo spomenija i dresove i svakodnevnu raspravu običnoga svita(ne nji),da zašto naši ne igradu u one dresove sa crveno biliman kockican,dresu koji je pripoznatljiv  na svakomen kantuniču ove naše zemljine balote i svi ga rado nosidu i Kinezi i Japanci i Korejanci i Englezi i …,a naši uporno igradu u ovoj nikoj tamnoj konbinaciji crno-modroj,za da bi onda  oni koji to moraju,(po fejsiman i ostaliman mrižan) opravdavali kako je crna boja sad u modi itd.ok,to da san ja reka pa dobro,ali to mi objašnjajedu „one rvatine“…,pa mi je to ka malo čudno,jerbo nije  dres sa crveno biliman kockican slučajno nasta i ote u razgovoru podsjetin  kako nan je upravo državni grb takvi,a onda sa druge strane dobiješ samo muk.

A i jučera su mi jedni ča se bolje od mene u balun razumidu,objašnjajedu da to nije do nji,jerbo da tote igra i to jesi li domačin ili gost itd.itd.

A dobro,ako je tako,a oli onda  na svake te druge drese koji ulazidu u moguču opciju,kreatori nisu mogli ubacit dijal dezena sa crveno biliman kockican????

Ma moga bi ja još puno toga ovde napisat,ma neču,jerbo „onima“ ni  cila ispisana velika bala, one bile masne karte iz ex Jugovinila ne bi pomogla,ali  ka ča to več po običaju u nas gre,sve če bit u redu dokle bude kako triba ič,a doče dan pa če ovi isti koji sad igrače i trenera dižedu u nebesa,drvlje i kamenje po njiman iskričat, sičan se  kad je Bilić bija izbornik i u jednomen intervjuju na početku karijere reka,da je sve dobro dokle gre onako kako triba ,a kad ne bude više kako triba odit,onda,ne samo on,nego ni ona  kravata koju bude nosit,više neče valjat.A znamo ča se dogodilo.

Evo malo crveno bili kockic: