Puno toga se ove dane o Ultri moglo čut i pročitat,pa je npr. tako nakon svake večeri bilo čuđenja kako je prva pomoč jemala malo posla i nije bilo nikakvi neredi???
Ma dobro pustimo to,uvatimo se ničega drugoga,doli na Rivu te dane od Ultre komunalni redari su zaustavljali mladost ča je tote odila bez majic i naplačivali jin kazne,e neka znadu kakvi je u nas red dobacija je ovi jedan čovik ča je skupa sa ženon na šentadu sidija, ovemu redaru,je reka je redar neka znadu di su došli,a vamo na drugu šentadu smo sidili ja i čer mi,a naravno,mora san se nakon ovi izrečeni besid sad i ja umišat,pa govorin ja njiman kako oni puno dobro znadu di su došli,ma kako vidin ,jema ji puno naši koji nemadu pojma di žividu.

Mi čemo njiman pokazat šta je red,a oti mladi svit,ako ste ji malo pratili,neče da itne plastičnu anbalažu ili kartu skupa sa ostalin otpadon,tamo isprid ulaza za Ultru bilo je par kontejneri,oni gvozdeni i u svakoga bi zavirili za oto ča su jemali u ruci za bacit,pa kad bi došli do zanjega kontejnera i svatili da nimadu di oto plastike ostavit,onda bi teške muke u oti zanji kontejner itnili.
Došlo je mladoga svita iz 140 zemalj sa cile ove naše balote od Zemlje,razni politički uvjerenji,razni vir…a u godinama su kad jin adrenalin skače na svaku pizdariju i po sviman otiman parametriman (promatrajuči kako je to ovde u nas) tribalo bi onda tote bit sukobi od biblijski razmjeri,a kad ono ništa,a neču sad opet spominjat utaknice između Ajduka i Dinama i policijsko osiguranje,koje na takvoj utaknici bude prisutno, jerbo se između sebe ne moremo trpit ili npr.utaknicu od naše reprezentacije koja je došla i odigrala utakmicu u Omišu za 100 rođendan NK “OMIŠ”koju su morale osiguravat jake policijske snage???? Da,upravo tako i onda čemo mi pokazat otiman ča šetadu bez majice di su došli,a sa ovin ča su jin naplatili kaznu smo sad sve probleme riješili.
BRAVO!