Fermala me nika dica u selo i pitadu da jesan li ja oni ča piše na ganjc novomen?
A je,ča van triba?
A da bi li moga napisat da vratidu koševe na igralištu isprid Osnovne škole,eto došla su lipa vrimena,dosadilo jin je više po mobiteliman badat,više bi volili bit vanka na zraku i igrat se,pa ako bi ja moga to napisat.
Da bi li moga,eto čin se večeras uvatin konpjutera prvo ča če bit je oto napisat,a i ne virujen da če bit niki problemi i da če se koševi meknit jer je i stožer reka da se dica moredu opet igrat,a i ravnateljica je puno puti na sastanciman govorila kako su vrata na školskomen igralištu non stop otvorena baš zbog toga da se dica na igralištu moredu igrat.