Jo ča je brzo izletilo ove četiri godine od zanji izbori za parlament,pa sad opet one ča ji gledamo po televizijan moremo uživo vidit na ulican,kako se rukujedu i ljubidu sa potencijalniman glasačiman,sa svi stran pljuštidu razna predizborna obečanja,a kad izbori pročedu onda bude opet sve po staromen,na nas se zaboravi.
Pa je tako ča se tiče obečanji bilo i jučera u Kaštiliman di nas je posjetija Davor Bernardić,presjednik SDP-a,koji je bija i u Sučurcu di se družija sa građaniman našega sela,a domačin mu je bija naš miščanin,Matko Kuzmanić koji bi po sviman parametriman nakon izbori triba sest u saborske klupe,a Sučurac nakon duuugo godin, moga ponovno imat saborskoga zastupnika i nadan se da, kako to več po običaju u nas bude i Matko kad se smisti u Sabor,neče zaboravit na svoje misto i da jučerašnja izjava Bernardića,kako se do sada prema Kaštiliman odnosilo mačehinski,a oni ako dođedu na vlast,če to prominit i Kaštila kroz razne projekte tribala doživit renesansni procvat,neće bit još samo jedno puko obečanje koje če, kako to več u nas biva, nakon izbori ič u vitar.

Eto i ča na kraju još reč,sritno Matko i kad dođeš gori u oni “veliki grad”,nemoj zaboravit na ovo naše malo selo iz kojega si doša.