A najjače mi je kad dođedu diko za svjedočit šta je bilo pri jednu dvadeset trideset…godin,a ono ča je bilo pri dvi tri godine se ne panti,pa san tako jutros u selu moga čut priče oba tomen kako jema puno,puuuno godin kako ovakva buretina u nas nije puvala,a ne nije,nego tamo u drugi misec 2019.je ovde u nas bila najjača bura od kako je mirenji,a puvala je 187 kilometri na uru,eto za one šta su zaboravili.
A ova od sinoč i danas je divlje puvala,a ča se tiče štete,fala Bogu, nije baš ništo puno učinila,iskrivila je par znakov,sinoč je doli na Rivu turnila jedno stablo sa plitkiman žilan,isprid banke je pukla nika grana,ali to je prilično “trusno” područje,jerbo se i nikidan sa istoga stabla jedna grana odcipila,a kad se malo bolje pogleda sva bi ona stabla tribalo skresat,da se ne dogodi dežgracija,koga poklopi ili učini štetu…
A onda je jutros palo i ono nazovimo stablo,a ustvari je javor,južno od knjižnice, šta ga je pustilo u da reste u vis,ka po običaju u Starčevićevoj je opet iz pravca firme šta se tote nalazi,svašta letilo…Eto.

Stablo kraaj Bobisa šta je sinoč palo:

Grana koja se odlomila sa stabla isprid banke:

Isprik knjižnice:

A ovako izgleda Starčevićeva ulica,po običaju,sigurno če ovako bit miseciman ili dok se koko od stanovnikov ne uvati posla i ka i zanji put,skupi na jarpu i opet čeka daniman da koko od gradski službi oto dođe pokupit…

A evo za one zaboravne text od 2019 godine,da se prisitidu kako je to onda puvalo:

Ovako je to danas izgledalo kad je puvala najjača bura od kako je mirenja (187 KM)

Postavio:admin Datum:February 23, 2019 7:10 pm

A taman je prošlo dvadeset daan od kako je u Jamerike učinilo ono leda koji je bija taki da su na ulican pljačkali one ča su bili obučeni u one Kanadske kapute od dvi iljade dolari,pod pritnjon pištolon ji skidali na licu mista i na se ji obučivali i ka ča je to i do sad bilo,samo neznan u kojemu obliku,ali je sigurno da oti led ča učini tamo,za jednu dvadesetak-tridesetak daan dođe i ovde kod nas.

A ovde je doša u vidu žestoke bure sa tenperaturon od minus dva,uz koju je parija osjet ka da je minus trista,a na refule je ota bura bila i 187 kilometri na sat i u svome divljanju je činila velike štete,pa je tako doli na Sokolanu podiglo cilu onu novonapravljenu nadstrešnicu od jednu tridesetak kvadrati i pribacilo je jednu petnajestak metri,gori na rukometno igralište,otkrila ljudiman plastenike, pa je onda iskrenila parkirani šleper,more na Gojači je parilo ka da su brzaci,a toliko je morsku prašinu dizalo u vis da je pribacalo od sjevera priko Marjana doli na južnu bandu,dok je onima u Vranjicu parilo ka da jin kiša pada,a sa svi stran su letile kupe,tako da je kaciga bila potribni modni detalj,sa zgrade na Gospici kupe su letile na drugu bandu priko ceste,o kontejneriman koji su šetali ne triba ni govorit,u mojoj ulici odozgar di su parkirani kamioni letili su razni dijelovi,kante,bačve…,ka i po cilomen selu,nima ča nije letilo i padalo,a vridni komunalni redari su cilo vrime patrolirali i micali ote predmete sa ceest i ulic,a kako se iz kave dizala prašina  parilo je ka da je u Gaju požar i kad se mislilo da je oto divljega vitra počelo kalavat,a i na radiju je govorilo kako je jema bit ono najgore iza nas,zove mene ovi jedan na mobitel da di san,a di san,a doma,ka malo san se jutros smrza,grij se ti grij, a vatrogascima je rastvorilo krov,blokiran je promet između Magistrale i štrike,a ti lipo stoj doma, a kad san doša na licu mista jema san ča i vidit,rastvorilo je krov ka sardinu,a pošto nevolja nikad nije sama,nego uza sebe uvik jema i društvo,oto osandesetak kvadrati lima sa krova letilo je jednu pedesetak metri savinilo je konzolu na jednoj kuči,srušilo stup od struje udrilo čoviku u krov,rasulo trnite dijal pa doli iza kuče,a ostatak priletija priko krova i pa tamo malo dalje,a umorni vatrogasci koji su cilu noč i dan micali ono ča je bura bacala i rušila,uz pomoč svojih kolega  iz Gomilice i Donji Kaštili sad su još morali i ovo sanirat.