Kako to več ča se ovega događaja tiče ide,ovo je more se slobodno reč,jedno od luđi događaji ča se več evo dvadeset godin u našemu selu čini.2020 godine se priskočilo radi ono nesriknje korone.Utrka se događa na svetoga Stipana u tri ure popodne,a šta je vrlo zanimljivo da samo koju minut pri same utrke Zagor nema pojma koliko če se ekip prijavit,oče li to bit jedna,pet,petnajst,nijedna…,a zanimljivo je i to da npr.okolo tri manje kvarat,publike bude za na dvi ruke na prste izbrojat,dok u tri ure,vrime početka utrke na Kajinomen brigu i doli kraj starega kanpanela bude mašo svita,ča oče reč u malo vrimena skupi se čudo svita za vidit one ča če se vozikat na komadu daske-karičiman ča na sebi jemadu željezna kola-balinjere,na koje smo se,kad smo bili dica,po cile dane vozikali,a oni veliki ča od buke nisu mogli živit,su trčali za nan i kendali nas di bi se ko pojavili…

Ka po običaju,sve se odvija okolo topa na Glavici okle utrka kreče i završaje,naravno,komentari od prisutni jema toliko da bi moga jednu lipu knjigu od nji učinit,a jema i ginganja glavan uz onu nezaobilaznu,a vidi luđakov,ma to je sve dijal ovega folklora,koji ča se utrke tiče,traje okolo sedan minuti,a kako utrka krene i prođe Kajin brig,tako i gledaoci sad trčedu na drugu bandu,tamo kraj stare škole i pošte,za vidit ko je prvi od banane put uzgor krenija i kroza špalir,sa obe strane uz pljesak,natjecatelji prolazidu put cilja…

Ekipe primjenjijedu razne taktike za ča pri do cilja doč,jer je staza prilično zahtjevna,nakon nizbrdice,moradu sač sa kariči i sa karičen ispod ruke pritrčat dijal di je bila stara crikva,tako da puno nji kalkulira je li jin bolje sve doli do kanpanela se vozit,oli koji desetak-dvadesetak metri pri sa kariča sač i uvatit se trčat,pa jin onda gre jedan dijal ravne etape od Mula do Banane,bez ikakvi preprek,a zadnja etapa jin je uzbrdica,a na vrju ote uzbrdica čeka ji zamka,rešetke priko cile širine ceste koje su žestoki neprijatelj balinjeraman,to da za ovakvu utrku triba jemat dobru kondiciju ne triba niti spominjat,posli utrke puno nji se iskrene po podu,a bude  i povračanja.

Inače su u ovoj utrci pobjedili Frzelini,a osoba sa strijačen na glavi, šta je pobjedniciman podilila nagrade,je predsjednik Zajednice tehničke kulture Splitsko dalmatinske županije.

Kako je ovo bila jubilarna,dvadeseta po redu utrka kariči,podiljeno je i okolo stopedeset prigodni majic.

An pače,umalo san zaboravija,OLDTIMER MOTO KLUB ADRIJA koji je organizator Mašokariča,ove godine slavi svoj okrugli jubilej od trideset godin svoga postojanja,tako da oni ča dilidu nagrade Grada imadu to na umu,jerbo od strane Mjesnoga odbora Moto klub ne more bit pridložen,jerbo je MO raspušten.