Svjedoci smo kako je nedavno u Splitu uz ono vitra i krupa učinila svoj dijal štete.

Evo i ova dva dana govorilo se o superčelijskiman oblaciman(pri dvi godine kad ji je jedan iz Srbije,ča se prognozon bavi prvi spomenija,svi su mu se iz struke rugali…),a sad je to ka normalno,eto nevrimena i superčelij,a jutros su išli toliko daleko da su spomenili i exploziju oti superčelijski oblakov i pošto ji je ono nikidan kad se u Splitu dogodilo nevrime,opralo,kako nas nisu na vrime upozorili,ovi put su se toliko potrudili da san na jedno misto moga pročitat i kako če se razvit oti superčelijski oblaci i kako je moguč olujni vitar i kako su moguče bujične poplave i mogučnost grada,tuče,krupe itd.itd.…,naravno,biče to tamo di se dogodi…

I dokle su u unutrašnjosti Hrvaske u ona vrimena olujne oblake razbijale protugradne rakete,koji više nima,rekli su da štetidu,neznan sad kome,a i da nisu toliko svrsishodne ka ča se mislilo…bla,bla,ovde u nas su se palila crkvena zvona,ova naša u Sučurcu su,a mislin da je tako i ostalo,jerbo se zvona ne minjadu baš tako kako kome pada na pamet, jedna od jači i kad bi se spremalo nevrime,znali su ljudi po oblaciman da se sprema krupa koja je bila,a i ostala veliki neprijatelj poljoprivredi od koje su živili,zvona sa naše crikve počela bi u svi šesnaest bubat,a Gomiličani i Kanbelovčani bi rekli,uf dobro je,Sučurani zvonidu ne tribamo se bojat da če nan krupa po poljiman štetu činit,

E sad,zašto se zvona kad je nevrime više ne čujedu neznan,jer to nima nikakve veze sa običajiman koji smo se olako odrekli,a ja bi se  vratija na ono gori naslova,Je li nas zvonjava sa Sučuračke crikve more spasit od krupe i spomenija bi natpis kojega su naši stari na zvono utisnili, OD MUNJE GROMA I GRADA OSLOBODI NAS GOSPODINE,a eto,ja virujen da more,ali ko mene pita,moje virovanje sigurno neče prid sljedeče nevrime,naša zvona pokrenit.

Evo slike našega zvona,jema oni ča mi,kad san jin reka,ne virujedu za ova slova ča pišedu na zvonu,a pa evo,kako se ono reče,slika govori iljadu besid:

Inače naša crikva jema tri zvona,dva velika i jedno malo,ovo manje bi se oglasilo zbog diteta: