Reče koko,ma vidi ovega ča on jema sad oba Šizi pisat,a jeman,neka se zna…

Neznan kako počet jerbo nije lako u par rečenic napisat i u njiman opisat čovika koji je ono ča se reče,živija sto na sat,Šiza je od kako ga znan,a znamo se još od prvoga razreda,jerbo smo generacija,on je odija u A,ja u Ce razred i ono kako se u nas reče,od mali nog se upisa na rukomet,sičate se muškoga rukometa u Sučurcu,to su bile utakmice,a tribine su bile krcate svita,dobro,on je bija malo mlađi,ali kasnije je i on stasa ,a bija je aktivan igrač sve do svoje trideset i pete godine,ča u Sučurcu,pa u Splitu,pa opet u Rukometnomen klubu Kaštila…
kad je ferma sa igron,nastavija je ka trener,a niko vrime je bija i presjednik Sučuračkoga rukometnoga kluba,a kad je Počeja Domovinski rat,nije ga tribalo po podrumiman iskat za poziv mu uručit,sam se je dragovoljno javija,a tamo malo izad dviiljadete godine,kad je puno nji za konpjuter samo čulo i gledali ga u brošuraman,osniva „Informatičku Udrugu 7 Kaštela“ u kojoj je puno nas iz sela (i ja),ka i iz cili Kaštili,a bome i Splita dobilo osnove u baratanju tipkovnicon i radu hardvera i softvera,a pa se Dragan tamo davne dviiljade i pete godine sitija otvorit i Sučurački portal-sucurac.info di su se mogle nač razne novitade iz našega sela,a pošto nas je pri toga u udruzi informatički dobro potkova,sad smo mogli oto portala redovito obalazit,a bome,bilo je to vrlo zanimljivo misto za čakulu,jerbo smo,ča je ko jema pametno za komentirat,tote ostavljali svoje „pametne“ misli,a puno puti bi se to priokrenilo u karbu i to žestoku,da je tako još koju godinu nastavilo,niko sa nikin u selo nebi priča,a sucurac.info se pomalo,ali sigurno gasija,moga bi ja sad puno ovde slovi oba tomen nabubat,ali neču.
Šiza je dobitnik i skupne nagrade Grada Kaštili za informatiku i rukomet…

Sičamo se kako je sve diga na noge kad su tili tamo di su zapadne tribine od rukometnoga igrališta proč sa kanalizacijskon cijevi,pa su nakon toga odustali,sičamo se i toga kako smo (bilo nas je četvoro i on jedan od nas) išli na Splisku rivu činit prosvjede,protiv spaljivanja šveleri i RDF-a,a i ono pri koju godinu kad je reka da če,kad neče niko,on sam na Sokolanu poč učinit prosvjed,protiv benzinske punpe koja se spominje da če se tamo na puntu učinit,nije bija sam,bilo nas je još,ali je bija inicijator,nakon toga smo nas dvojica učinili radnu akciju i u pličaku plaže na Sokolani vadili bovane,za da ljudi kad se ulazidu za kupat,nebi iskričali gnjate i ranjavani iz mora izlazili,a onda,vidin kroza priču u selo,kako ljudi ostanedu iznenađeni,jerbo neznaju kako je Dragan učinija i jednu lipu knjigu,dugo je on na komadičiman karte,kasnije i fejsbuku notava ono ča bi mu trenutno palo na pamet,a pa je to,kad je doša do malo pinez,jer nije tija da ga niko financira,oto sve smistija u jednu knjigu,ustvari,nije to knjiga,več zbirka poezije koja je svitlo dana,nakon dugi sedan osan godin pisanja na komadiman novine,škartociman,zgužvanomen komadu karte koja bi mu se u tomen momentu našla u ruci,ugledala dviiljade i dvadeset i prve godine i kad mi je oto knjige da,reka mi je biče toga još,ali,kako znamo,život je nepredvidiv,niko od nas nezna ča ga čeka,dođe nenajavljeno i naglo. I Šize više nima…

I evo na kraju stihovi koje je Dragan napisa 2018.godine za sve one koji više nisu među nan:

Ti ca si pored nas zivija

Ti ca si pored nas zivija
Gre nan vrime.
Vaja poc.
Put mastrinke
Ca nas ceka
Tako u nas u selu
Od pamtivjeka.

A ni opet fer
Kad gredu dobri prije zli
Rastace se generacija moja
I do cega meni danas je?

Ni do cega
Ni do cega…

Evo kontan jos nan nije vrime
Ajmo zastat pa pokajmo grije
Ma ni oni gori nije uvik fer
Uzme nama ljude drage mile
Uzme nan ih i pri ca smo mislili
Da njemu gredu…

Pa da je bilo jos diko na rivi zastat
Malo iscakulat izjadat
Sitit se oni dan ca nas zajedno vezu…

Nasmijat se bazama
Za nekin i pustit suzu ono ka da necemo

Niko ovod nije fer.

Ni mi ni on ni ja
Tek danas uspomena stoji sad
Da je on
Oti s nama i pored nas
Zivija…..

Dragan Kovač, 17.12.2018

—————————————————————————————————————
A evo ovo je text kojega san učinija o Draganovoj zbirci poezije koju je napisa

Dragan Kovač napisa je knjigu

Postavio:admin
Datum:December 24, 2021 12:05 am

Ustvari, da se stručno izrazin,nije to knjiga,več zbirka poezije sa kojon je Dragan počeja pri jednu sedan osan godin,kako bi mu došla misal vazeja bi olovku i to meka na kartu,jer puno puti ako to ne zapišeš ode misal u nepovrat,e i sve to ča je pisa po škartociman,na komadu novine,zgužvanomen komadu karte koji bi mu se u tomen momentu naša pri ruci… sad je meka na jedno misto,odlučija je samostalno financirat projekat pod nazivon „Riči i slike“,pa je tako knjiga jema dva dana izašla iz štanpe koja je puna Draganovi stihov popračeni slikama od Roberta Marića,suradnja je to koja je krenila najpri virtualno,na fejsbuku,di bi Robert meka koju sliku,a Dragan bi do te slike napisa koji svoj stih i pala je ideja,zašto se iz virtualnoga to nebi pritvorilo u zbilju,učinila zbirka,jer jedno je čitat sa ekrana,a sasvin ništo drugo držat libar u ruci i okričat strane,pa napravit uvo za sinjat di si sta,ah ta knjiga i evo, knjiga je izašla u godini čitanja,a projekat je čisti Kaštelanski od autora stihov,autora slik,ka i štanparije iz našega sela koja je knjigu učinila.
Eto,za sad toliko,a kako mi je Dragan reka,biče toga još,pa kad bude čut čemo se,a Vi se potrudite da šta pri dođete do ovega libra,jerbo če brzo nestat.

Uvodna rič Roberta Marića:

Predgovor spisateljice nataše Jukić

A ovo doli su biografije od nji dvojice