Od kako je početkon devetoga miseca meklo oni doli znak da se na rivu ne smi zaustavljat i parkirat niko ga nije obadava i ka po običaju sa južne bande je uvik bilo krcato aut tako da se dvi aute nikako ne moredu mimoič i onda ovi iz pravca sokolane prema selu kad vidi da nima nikoga iz suprotne bande udre po gasu za ča pri proč jer mu je dosta više čekanja i straj ga je da mu u po puta ne dođe koko pa da se onda mora u rikverac nazad vračat. Ali i tome se ima bit stalo na kraj jerbo je počeja pauk nosit aute,a i svako malo na motoriman se moredu vidit prometni policajci tako da je jutros riva bila skroz čista.
Opet ono ali, sad se ima bit stvorija novi problem jer oni ča sededu u kafič nimadu di ostavit aute tako da ji sad jema na svakome kantunu i na oti način se otvaradu nove opasnosti,a i odisprid oni zgrad ča su odizad Bobisa ne moreš ni iglu bacit koliko ji jema i to ne mali broj puti se zagradi i druga auta pa neka ovi “laje”. Svi se slažedu da je ovu ulicu tribalo dovest u red i da druge ulice po selu isto tako triba dovest u red,ali isto tako i da triba čako učinit šta se tiče parkirnoga prostora jerbo je u selo svaki dan sve više aut,a selo je vako kakvo je učinjeno jema “miljun” godin.
I na kraju moja Van je preporuka da se pridržavate prometni znakov jer nema smisla prkosit kad znate da če te dobit kaznu,a ujedno ste opasnost za promet,a šta se tiče rješavanja prometne problematike,a triba upirat kod oni koji su se gracali za doč na mista na kojima se problemi rješajedu.

Prije:

jutros: