Jučera-subota održana je devedeseta po redu Mrdulja na koju se skupilo dvista jedrilic,ali vrime jin u samomen početku nije bilo baš naklono,dosta vrimena nakon šta je označen start,svi su još uvik bili na jarpi,jerbo jin vitar baš nije iša u prilog,ča oče reč bilo je ništo slabašnoga lahorčiča,a ovod di san bija za učinit slike bilo je par znalac,je,je,to su isti oni ča bi na utaknici zamisto trenera učinija ovako,oli onako,pa je bilo,a nima ništa od ove regate,vidi kako su posloženi oblaci,neče bit vitra,a onda kad se čutilo malo vitra bilo je,a ovo če sad malo zapuvat,pa če onda ojačat i naglo če stat,a kad ono nakon uru vrimena,ne da je sta,več je nosija sve prid sebon,a ja više nisan bija tote za čut stručnjake ča su sad oba vitru govorili,ali bilo kako bilo uvik kad se ništo događa jemamo stručnjake-promatrače sa strane koji najboje znadu kako bi tribalo,ča zna oni tamo koji je na licu mista-na brodu,bolje zna ovi ča ga gleda sa kilometra udaljenosti na kopnu,a zašto je oni iša tamo,bilo bi mu bolje da je iša vamo i sad če jemat problema i ko zna kad če do Mrduje doč,a ča je najgore od svega ti o kojemu su govorili je na kraju ispa pobjednik…