Nakon ča je sta pet dan u Splitu največi nosač avijoni na svitu Harry S. Truman,dužine 333 metra,oliti ga ka tri nogometna igrališta,širok sedandeset i osan metri,visok sedandeset i četiri,sa gazon od dvanajst metri,težina sto iljad ton,more nosit oko 85 avijoni,dvadesetak helikopteri,na nosaču se nalazi oko četiri iljade i devesto dvadesetak ljudi (Gomilica jema oko četiri iljade i osansto jedanajst),a šta se tiče ekologije,jerbo se prije nego ča je doša govorilo kako če nan ostavit pusta govna i maščuku,triba reč da nima grada u Hrvaskoj koji je ekološkiji od ovega nosača avijoni,popularno nazvanoga “Usamljeni ratnik”sve se pročiščava,opet iskorištava,kruto sagorjeva,a ono ča bi kroza dim tribalo izač vanka u filteriman se zadržava.

Inače,ovakve nosače obavezno prati koja podmorničica,to je ka mala tajna,a isto tako uza sebe jema i koju šešulicu ka ča čete jednu vidit na slikan,ča su je jutros sa remorkeriman vukli iz Lore (biče nije tila upalit),ali je stvarna tajna koliko na nosač more stat avijonskoga goriva i sistem kako radidu katapulti za avijone,a koje Amerikanci jemadu najbolje na svitu.Ti se podaci nigdi ne moredu nač.

A, bilo kako bilo u Split ne more ništa mirno proč,pa je tako par članov Radničke fronte učinilo demonštancijun i ni jin je baš darago ča je nosač ovde,dobro je ča brod nije malo bliže,jerbo bi se bar koko bija stinon u njega itnija,a ja san Filku ono kad smo se u subotu autobuson vračali sa Pelješca reka da oče li sa menon u onemu čuvenomen gumenjaku poč iz bliza vidit oto nosača,pa me lipo pogleda,mislija me pitat jeli se to ka zajebajen,ali mu je brzo prošlo kroz glavu da nije,pa je samo učinija HM,a ja nastavija,ajde, pa če nas Neno lipo snimit i meknit na jubito i eto pet minuti slave,a i ne virujen da bi nan oni na brodu ča zamirili,ipak dolazidu iz zemlje u kojiman ljudi činidu kojekakve makakade za vidit se koju sekundu na televiziju.Da oču li sam poč ili če me on poslat? Lipo mi je reka.