Ona meni sinoč okolo deset ipo da ča ovo vanka vonja,nigdi ništo gori,ama ča gori,vidi da pada kiša,a niti je grmilo,niti sivalo,ali po ure kasnije opet Ona, da pari ka da kankare niko užiže,a dobro,biče koko iskoristija kišu pa ispod lunbrele loži ote kankare,jerbo zna da neče nikoga po ovemu povodaju bit vanka i vidit ga ča radi…

E,a kad je ujutro vidila portale,onda je bilo,a ča san ti ja rekla,vidi,piše da gori na Karepovcu.
I je,govoridu da gori glomazni otpad,jarpetina di se iskriče drvo,stari namještaj…,a onda čitan da su sinoč u isto vrime bila dva požara,ovi o kojemu govorin i drugi stotinjak metri dalje, vanka ograde od Karepovca di je gorila trava…?

Iako je bilo lipo dima,a bome i smrada,govoridu oni ča čitadu aparate koji miridu čestice i ostale anomalije puštene u ariju, kako je,ča se kvalitete zraka tiče,sve bilo u propisaniman granicaman,a naravno, kako to več ide,svako od nas če to po svoju protumačit…