Ne pristajedu sa pecetan kad mi prođedu kraj kuče i vididu da san na poštanskomen sandučiču napisa ONLY PAVELIN,a da koji mi je to,niki rođak iz Jamerik,a nije to smo nabavili kučnoga ljubimca,pitona od jednu desetak metri,pa kako jema puno “prijatelji-svojtu”od oni ča ji je zadavija, proguca…,mirita da mu se stavi ime,a mene ste našli zajebavat,a eto,jema dvajstipet daan,da san oto natpisa meka na ono sandučiča od pošte,jerbo to nije bilo normalno koliko bi mi kuverat od drugi u njega uvalilo,a pošto je poštu nosija,Nepalac,Filipinac,pa onda Hrvat,iza toga opet Nepalac…,več san oba tomen pisa,pa pogledajte…,a š njiman san se mora uvik raspravljat da tote stojidu samo Pavelini,e onda nije bilo druge nego ovo napisat,a onda je bilo,a ča kad ti opet bude nosit koji naš,a ništa,ako ja od šezdeset godin znan za Onliya,a onda bi moga i on.

Znači,nakon ča je oni naš iz sela koji je počeja nosit poštu i parilo kako če sa problemiman sa pošton bit stvar prošlosti,oti je nakon par daan da otkaz i onda eto opet Nepalca,sriča dolazija san auton iz pravca sela kad je ovi uvaljiva ote silne kuverte i dokle san izlazija iz aute,on je taman seja na motor i krenija dalje,a dokle san oto sve ča mi je u sandučič uvalija, iz njega izvadija,prošlo je skoro pet minuti,asti,ča je ovo,jema unutra bar dvadesetak kuverat,gledan ja i naravno,sve skupa ji je bilo sedamnajst,a odo toga nji jedanajst od drugi prezimen,gledan ja di je ovi ča je ovo sve u sandučič uvalija,dežuran na putu i lipi dvadesetak minuti,staje jedan sa auton i kad je vidija koliko kuverti jeman u rukan,a da oli san i ja počeja poštu dilit,ajde ti lipo bip biiiip,posla san ga na misto i dokle mu kažijen ča mi je sve u sandučič uvalilo,taman vidin nikoga na onemu motorinu od pošte kako gre put vamo,mašen rukon i zaustavljan ga,a kroz vizir od kacige vidin da je naš čovik,da ča je,a ništa,oli san ja glavni sabirni centar u ulici i dajen mu ote puste kuverte ča mi ji je dodatno ubacilo,a on meni,da nije to bija on,več da je to ubacija Nepalac,neznan ko je,ali znan da to nije moje,nervozno je vazeja ote kuverte,veza ji nikon gumicon i počeja brontulat,počeja je beštimat na sebe i ništo spominja dan kad se ovega uvatija i da ča njemu ovo triba i …

Uglavnon,bilo kako bilo,odo toga dana,do dana današnjega u sandučiču jema samo pošte na moje prezime,ovi drugi nima,dokle če to bit tako neznan,ali znan,da ča se tiče pošte,još uvik nije sve selo na svoje misto,evo npr.račun od smeča ča ga je tribalo platit krajen desetoga miseca,doša je tek peti jedanajestoga,ovoj jednoj iz Varoša,račun od telefonije kojega triba platit do šesnajestoga desetoga,doša je tek sedmoga jedanajestoga,dok je za prošli misec,jer je isto tako kasnilo,dobila opomenu itd.itd.,a na sjednici mjesnoga odbora ča smo je jemali 17.listopada,presjednica Ivana mi se smijala kako san mejlon posla da bi bilo dobro da mi ka MO pošaljemo koji dopis prema pošti,da njoj nije jasno kako bi mi ka MO mogli to napisat,ustvari,ispalo je da svaki oni koji jema problem,neka samostalno to sa pošton i rješaje,ali čekaj malo,ovde nemadu problem pojedinci,več veliki dijal stanovnika našega sela…,ali dobro.

Znači,koliko ko je dosad poštari bilo,svi spominjedu kako se ne moredu snač,a ako je več tako,neka lipo,ka ča su se sitili za zgrade,di če plačat onima koji tamo stojidu da jin po ulaziman poštu razdilidu,tako bi mogli uvest praksu i za kvartove…

Evo ovo je oto višak kuverti ča mi ji je u sandučič meklo i nakon čega san mora ma sandučič isprid prezimena meknit ono only…

A ovo doli texta o pošti napisa san krajen osmoga miseca:

Šta se događa sa pošton u našemu selu?

Postavio:admin Datum:August 23, 2025 6:04 pm

Svako malo čitamo kako ljudi jemadu problema sa pošton,ustvari ne dobijedu pisma-račune na vrime,kasnidu i po misec daan,uopče ji ne dobijedu,pa jin dolazidu opomene,zatezne kamate,straj ji je da jin zbog nemogučnosti plačanja,jer nisu dobili režije koje moradu platit, ne blokiradu račun radi ovrhe itd.itd.,ustvari,briga me za druge,evo zanje čitan i u Gomilici isto imadu problema,mene je briga za naše misto,to ča mi govoridu da šta Mjesni odbor čako ne poduzme,pošalje oštru notu,jerbo to ča če građani našega sela jedan po jedan slavat,ništa neče prominit,a mi,ča su nas oni izabrali da jin rješajemo probleme,moremo i te kako po tomen pitanju čako napravit,a ja jin samo manen rukon,aha,čekajte Vi Mjesni odbor čekajte,ka da se tamo rješajedu tekuči problemi u našemu mistu,tamo je niko sve izokrenija i zamisto da mi ka Mjesni odbor idemo sa problemima prema Gradskiman služban u nas to gre naopako,ono ča su oni u Gradu naumili učinit to bude na dnevnomen redu sjednic,a da ji čako nebi slučajno od problemi iznenadilo,ukinili su točku razno,tako da kad bi npr. sutra jemali sjednicu,a ova problematika ča se ne dobivanja pošte na kučne adrese tiče,nebi bila na dnevnomen redu,o tomen problemu nebi mogli ni govorit,a pošto se po ovomen pitanju sjednica ne saziva,a problem več traje,onda znači da Vi-Mi samo mislimo kako problem postoji,jer kako mi je rečeno,a i ovde san več oba tomen pisa,jedan iz HDZ-ove večine u MO-u mi je reka da oli i oni isto tako ne stojidu u selu i neznadu za probleme u njemu…

A šta se događa u našemu selu sa pošton? Koliko točno jemamo ili smo jemali poštari neznan,govori se da jemamo-smo jemali četiri,ali od kako je jedan od nji umra,(dobar čovik,svi su ga falili),pa se onda govori da je jedan od poštari da otkaz,ovi treči niko govori isto o otkazu,dok drugi da je na bolovanju i tako da smo ostali samo na jednoga,a onda se nakon nikoga vrimena pojavija,neznan sad je li Filipinac oli je Nepalac i naravno,mora san trčat za njin jerbo mi je meka poštu od nikoga drugoga,a za me nije bilo ništa i kad san ga ferma,on meni na ingleški kako nije on to meni u sandučič meka,nego niko drugi,ma zanimljivo,nima petnajestak dan nikoga i sad ispada da su dva u ulici,e i on meni na ingleški,a ja njemu na Hrvaski i prolazi mi kroz glavu di smo mi ovo došli,u svojoj zemlji moran govorit strani jezik za da bi se sporazumija sa poštaron koji radi za Hrvasku poštu?

U dučanu moran razgovarat na stranjski jezik da bi se u svojoj državi moga sporazumit sa nekin strancen koji tote radi,ča bi sad tribali,mi u Hrvaskoj poč učit strane jezike za da bi se mogli sporazumit sa stranciman koji su ovde u nas došli radit, a kad neču,ma stvarno je to zanimljivo,di ko ideš vanka,moraš znat njiov jezik,sad u svojoj zemlji,opet moran znat njiov jezik?Nisu oni krivi,niko jin je to dopustija,a kad je lakše nač jeftinu radnu snagu,pa ma okle ti ljudi došli,nego našemu čoviku dat pristojnu plaču pa da ostane ovde,a ne da mladi svit nakon školovanja gre vanka,a pa če se onda nakon nikoga vrimena pametnjakoviči zapitat,asti,a di su iz Hrvaske nestali Hrvati,jema bit da to svi vidimo osin oni koji bi to tribali vidit,iako i oni to vididi,samo se pravidu „čoravi“.

Teška tema,ako nastavin daleko bi me odvelo,nebi sta do sutra pisat,nego vratimo se mi na poštu koju ne dobijemo na vrime,susida mi u ponedijak govori da je pri desetak daan išla doli u poštu jerbo od prošloga miseca nije dobila nike račune,a pa pita mene da kako je kod mene ča se pošte tiče,a ja joj govorin kako san prošli misec uspija poplačat sve do zanjega dana sedmoga miseca,a da ovi osmi nisan još ništa dobija,a ona meni kako to kad je išla u poštu pri desetak daan,joj je reklo da neka ostavi adresu,prezime i broj mobitela,pa da čedu vidit i do koji dan joj se javit,a prošlo je i osan dan i niko joj se nije javija,pa je onda opet išla doli i govori jin kako je niko nije zva,a rekli su da če,a oni njoj da neznaju za to bla.bla. i da je tamo di jin stoji pošta opči haos,a nije do nji,dobro nije do nji,a da do koga je,biče do nas ča otu poštu tribamo primit,a jesmo i mi izveli,svaki misec nan poštar triba nosit poštu,ama ne triba meni niko nosit poštu,evo ja ču sam po nju poč i kako san razgovara sa susidon,a i sa drugiman koji su išli u poštu vidit ča jin kuverte ne dolazidu i svako od nji mi je ispriča svoj doživljaj,a pošta je svakodnevno puna ljudi koji dolazidu vidit zašto je ne dobijedu na kučnu adresu,pa ode i ja u ovi utorak vidit di je moja pošta,dobar dan,dobar dan,recite mi zašto mi još nije došla pošta,a pojedine račune san več triba platit,a da koja san ulica,Starčevićeva,govorin ja,au,da je to tamo izad jedna velika jarpa nerazvrstane pošte,pri koji dan jin je iz Splita tribala doč nika osoba za oto razvrstat,ali da se nije pojavila,e i šta čemo sad,pitan ja,a da tribamo čekat,ma čekajte malo,rokovi za plačanje računi tečedu,a mi čemo čekat da se koko siti kako bi ovi nered tribalo dovest u red,a da nije do nji,govoridu mi,(i usput iz plika vadi i tura mi niku ceduljicu isprintanu sa nikin mejlon i telefonon koji počinje sa 072…) dobro,nisan ni mislija sa vama raspravljat,di je šefica,a da je nimadu,voditelja smjene,a da ni to nimadu,ma blago vama,vi ste jedini koji nimadu nikoga navr sebe,(a znan da u pošti jemadu voditeljicu)a da jemadu,samo da je ta osoba šef za nikoliko pošti,a koji je broj i ime od toga,pa mi je napisalo ime i broj mobitela,za to čemo pričekat još koji dan za vidit kako če se odvijat situacija i sutra dan-srida,klapa gori na vratiman niko sa sandučičen,trčen ja za vidit ča je sad uvalilo,kad gledan ča mi je donilo,jedino račun od vode,a ove sve druge kuverte su od jednoga koji stoji stotinjak metri ispod mene i koji je sad druga ulica,ali još uvik mu pošta dolazi na Starčevićevu i to moj broj,jerbo je prije cili kvart bija Starčevićeva,za da bi nikomen palo na pamet,na jednu desetak ulic oto razbit,eto do nekle san na brzinu objasnija ovemu novomen poštaru,ča se ovoga područja tiče,a ja san reka kako ču, priko cilega sandučiča napisat svoje prezime,da u budučnosti ne bude zabune,eto,dobili smo,kako sad stvari stojidu novoga poštara,čovika iz našega sela,kojemu če tribat malo,ustvari, dosta vrimena da se ušemi,jerbo puno puti bi me i oni stari poštar pita po prezimenu na pismu di bi moga oti stat,a ja koji san ovde od rođenja,za otoga nikad čuja nisan,eto toliko za sad,ima bit da se nered u pošti počeja pomalo dovodit u red i jarpa kuverat u pošti se pomalo ali sigurno smanjije.

P.S. Svi govoridu,a kako je Spliski Promet riješija problem ča se tiče šoferi autobusi koji je tribalo povečalon iskat,a lipo,digli su ljudiman plače,eto.