Od ponediljka se nastavilo sa radoviman na onoj šetnici na Rivi di su jema i više od godinu daan izbivene kamene ploče i evo je danas i to napokon gotovo,rastresli su sve i kako sad stvari stojidu više se nijedna od ploč ne ginga,a dokle če to tako bit,a vidičemo.
I dokle se ova tri dana oto radilo,Sučurani su se rugali na svoj račun,pa je jedan reka,a pa sad neka koko reče kako se na našoj Rivi ništa ne radi,a je,je, doda je drugi,samo da izdrži do izbori u peti misec,a treči je doda, valjda če jin vrime ič na ruku i nijedna se lebičada,oli garbinada u međuvrimenu neče dogodit,a kad su radnici išli ča,a ovi jedan doša i vidija da one doli južne ploče ča su jin puknuti kantuni nisu prominili,samo je reka,a ovo je sigurno zacrtano u desetogodišnjemu planu,pa če kad bude i to doč na red za popravit.Lipo se proveja.Poslalo je kvragu i njega i planove.

Iako su oni to nikoliko dan radili,zanimljivo je kako od nadređenih nisu dobili nalog da i ove puknute ploče prominedu? Ovo je za rubriku virovali ili ne!