Danas popodne okolo tri manje deset iša san da ču auton gori put groblja i bija san prvi na semaforu,stojin ja stojin i vidin nikako čudno se ponašadu oni na cesti,ovi gre livo,ovi pravo,ovi desno,ovi se polukružno okriče…i sve u isto vrime??

Gledan ja u ovi svoj semafor i ne vidin ništa,ali pošto je sunce iza mene i još je nisko,mislija san da je to razlog,a pa san izaša vanka i dolazin isprid semafora,a taman kad san otvorija vrata od aute,jedan naš iz sela ča je dolazija iz pravca Solina i skreča nizdol,mi livo desno ginga rukon,a kad ono semafori ne radidu,a ča sad,stvorila se iza mene kolona,zanimljivo,nima nervozni,niko mi ne svira ča se ne mičen,a ča če mi svirat,kad se ja maknen,doče i on na red,a biče mu lipo ka i meni,a ča ču sad jadan ti san,triba bi ič drito put uzgor,a ovde ne stajedu ni kad je crveno,a kamo li če sad kad semafori ne radidu i odluka je pala,gren ja polako se uštekat put desno i uspija nikako,pa san se uputija put Vrili, tamo skrenija desno iša ispod podvožnjaka doša sa gornje bande Magistrale i uputija se put sela,pa lipo na otemu raskršču navr vatrogasac skrenija desno put groblja,a u međuvrimenu su došli i policajci koji su se uvatili regulirat promet,najpri je jedan od nji sta na sredinu i prova tako regulirat,ali je vrlo brzo odusta,jerbo je vidija da nebi baš dobro proša,a pa su dva policajca stali svaki na svomen “otoku” i promet odatle regulirali,e to je bilo po danu,a okolo pet ipo kad san se nanoge vrača iz sela iša san povirit je li to popravljeno,kad san ima šta vidit,ne samo da ne radidu semafori,več je i cilo raskršče zajedno sa ceston u mrčini,a policajac nima,a kako če ji bit kad se ništa ne vidi,moredu samo nastradat,a problem ča nima struje i gornja banda navr Magistra je u mraku,najvjerojatnije leži u podzemnomen kabelu,jerbo okolo pet ipo kad san tote bija,jednu tridesetak metri ispod vatrogasac radnici od Elektrodalmacije su bageron kopali cestu (a tek je asvaltiralo) i ako je,kako se to u žargonu od elektrostruke zna reč,”probija” kabel i kad dođedu do njega,triba vidit koliko je strada,oto nevaljalo maknit ča,nadožuntat novi…

To nije baš posal evo,uzeli smo dvi žice i sad čemo ji konbinirkaman zavrnit i zamotat izoliron,ipak je to kod ovi visokonaponski kabeli ča gredu od jedne do druge trafostanice,malo konpliciranije,a ovo gori ča san napisa,je,ako je samo na tome dilu komad otega kabela “probija”najjednostavniji kvar,koji se more dogodit,koji isto tako iziskuje vrimena za to dovest u red,ali ako nije…

I eto,to je u kratkiman crtaman to,provajte izbjegavat prilazit Magistralu put uzgor i nizdol,učinite ka i ja danas,ajdete desno,desno,koristite ona dva podvožnjaka šta ji imamo,a i pazite na onemu dilu od sela put vatrogasac,jerbo se tamo činidu radovi za da bi se otklonija kvar.